सहा बांगलादेशींची मायदेशी रवानगी

पिंपरी, ता. २२ : शहरात घुसखोरी करून राहणाऱ्या सहा जणांना वाकड परिसरातील भुजबळ चौकातून अटक केली. पिंपरी-चिंचवड पोलिसांच्या गुन्हे शाखेने ही कारवाई केली. दरम्यान, या घुसखोरांना त्यांच्या मायदेशी पाठवण्यात आले आहे.
या प्रकरणी पोलिसांनी दिलेल्या माहितीनुसार, शहरात काही बांगलादेशी नागरिक अनधिकृतपणे वास्तव्यास आहेत. ओळख लपवून ते कानाकोपऱ्यात राहत आहेत. शहरातील ठराविक परिसरात याबाबत तपासणी सुरू आहे. पोलिस आयुक्तांच्या आदेशानुसार या नागरिकांवर कारवाई करण्यात येत आहे.
दरम्यान, वाकड येथील कारवाईत पोलिसांनी मोहंमद उस्मान शिराजून अली शेख (वय ३४), अब्दुल्ला शागर मुल्ला (वय २५), मोबिन हारून शेख (वय ३९), जहांगिर बिलाल मुल्ला (वय ३५) मोहंमद इलाहीन इलियास बिक्ष्वास (वय २२), तोहिद मुस्लेम हसन शेख (वय २६, सर्व राहणार बांगलादेश) यांना ताब्यात घेत हद्दपार करण्यात आले आहे.
सहायक पोलिस आयुक्त विशाल हिरे, पोलिस निरीक्षक अरविंद पवार आणि कर्मचाऱ्यांनी ही कारवाई केली.