श्री मोरया गोसावींची द्वारयात्रा उद्यापासून

पिंपरी, ता. २३ : चिंचवड येथील श्रीमन् महासाधू श्री मोरया गोसावी महाराजांच्या पारंपरिक द्वारयात्रेला शुक्रवारपासून (ता.२५) प्रारंभ होणार आहे. श्रावण शुद्ध प्रतिपदा ते चतुर्थी असे चार दिवस चालणाऱ्या या धार्मिक यात्रेचा प्रारंभ श्री मोरया गोसावी महाराजांच्या संजीवन समाधी मंदिरातून दररोज सकाळी ९ वाजता होईल.

यात्रेच्या सुरुवातीला श्री चिंतामणी महाराज यांच्या समाधीस्थळी धूपारती होईल. त्यानंतर भाविकांच्या उपस्थितीत वाजतगाजत यात्रेचा समुदाय श्री मंगलमूर्ती वाड्यातून मार्गस्थ होईल. या यात्रेदरम्यान चारही दिशांना असलेल्या द्वारदेवींच्या मंदिरांना भेट दिली जाते. प्रत्येक ठिकाणी पूजन, गोंधळ, जोगवा व धार्मिक स्तोत्रांचे गायन होते. या आध्यात्मिक वातावरणात श्रद्धेने न्हालेल्या भाविकांचा सहभाग लक्षणीय असतो. यात्रेच्या दररोजच्या सांगतेनंतर देवस्थान ट्रस्टतर्फे महाप्रसाद वाटप करण्यात येतो, अशी माहिती माहिती चिंचवड देवस्थान ट्रस्टचे मुख्य विश्वस्त मंदार देव महाराज यांनी दिली. तसेच नागरिकांना यात्रेमध्ये सामील होण्याचे आवाहन केले .

द्वारयात्रेचा कार्यक्रम
२५ जुलै : पूर्वद्वार : श्री मांजराई देवी मंदिर, एम्पायर इस्टेट सोसायटी, चिंचवड
२६ जुलै : दक्षिणद्वार : श्री आसराई देवी मंदिर, वाकड
२७ जुलै : पश्चिमद्वार : श्री ओझराई देवी मंदिर, रावेत
२८ जुलै : उत्तरद्वार : श्री मुक्ताई देवी मंदिर व श्री खंडोबा मंदिर, आकुर्डी

श्रीमन् महासाधू श्री मोरया गोसावी महाराज यांची द्वारयात्रा ही परंपरा चिंचवडच्या आध्यात्मिक वारशाचे प्रतीक आहे. प्रत्येक वर्षी यात्रेत नागरिकांचा वाढता सहभाग ही श्रद्धेची साक्ष आहे.
- मंदार देव महाराज, मुख्य विश्वस्त, चिंचवड देवस्थान ट्रस्ट.