शहरातील पीएमपीएमएल बस थांब्याची दूरवस्था

शहरात काही थांब्यांच्या ठिकाणी फक्त पाट्या लावल्या आहेत. त्यामुळे बस थांबा नेमका कुठे आहे तेच कळत नाही. थांब्यावर बसण्याची व्यवस्था नसल्यामुळे महिला आणि ज्येष्ठांना त्रास होतो. प्रशासनाने बस थांबे सुस्थितीत आणावेत.
- रजनी शिरुडे, ज्येष्ठ नागरिक
---
अनेक थांब्यांच्या ठिकाणी बसायला जागाच नाही. बऱ्याच वेळा बस उशिरा येते. काही वेळा बरीच वाट पाहिल्यानंतर बस ‘ब्रेकडाऊन’ असल्याचे कळते. अनेक वेळा अर्धा-पाऊण तास थांब्यावर उन्हात किंवा पावसात उभे राहावे लागते.
- अर्चना ऐटवडे, महिला प्रवासी
----
‘पीएमपीएमएल’ बस थांब्यावर बाक लावावेत. ही अगदी प्राथमिक गरज आणि मूलभूत अपेक्षा आहे. एकीकडे भाडेवाढ करणाऱ्या प्रशासनाचा प्राथमिक सुविधा पुरविण्यावर कटाक्ष असायला पाहिजे.
- रूपेश गायकवाड, तरुण प्रवासी
----
थांब्यापाशी आल्यावर तेथे बाजूला असलेल्या दुकानात किंवा झाडाखाली बसची वाट पाहत उभे राहावे लागते. बस आली की धावपळ होते. पाठीवर दप्तराचे ओझे असतेच. त्यामुळे थांबा उभारला तर बस येईपर्यंत किमान बसता तरी येईल.
- सूरज महाडीक, विद्यार्थी
---
शहरातील अनेक बस थांब्यांवर पाट्या असल्याने स्टीलचे थांबे बसविण्याचा निर्णय झाला आहे. जेथे बस थांबे नाहीत आणि जेथे गरज आहे, तेथे थांबे बसविण्यात येणार आहेत.
- सतीश गव्हाणे, वाहतूक व्यवस्थापक, ‘पीएमपीएमएल’
----