भीमाशंकर, त्र्यंबकेश्‍वरसाठी श्रावणात एसटीच्या जादा गाड्या

पिंपरी, ता. २३ ः श्रावण महिना शुक्रवारपासून सुरू होणार आहे. यानिमित्ताने महाराष्ट्र राज्य मार्ग परिवहन महामंडळाच्या पुणे विभागातर्फे त्र्यंबकेश्‍वर आणि भीमाशंकरसाठी जादा गाड्या सोडण्यात येतील.
वल्लभनगर (पिंपरी) आणि शिवाजीनगर येथून या गाड्या सुटतील. १९ ऑगस्ट पर्यंत शिवाजीनगर आगारातून पहाटे ३.३० ते दुपारी चार पर्यंत दर एका तासाला आणि वल्लभनगर आगारातून शुक्रवार ते मंगळवार दरम्यान जादा गाड्यांचे नियोजन आहे.
श्रावणात दर सोमवारी आणि आठवड्याच्या शेवटी शनिवार, रविवारी भीमाशंकरला भाविकांची मोठ्या प्रमाणात गर्दी असते. तसेच भीमाशंकरला पर्यटनासाठी जाणाऱ्या नागरिकांची संख्या देखील अधिक असते. प्रवाशांची वाढती संख्या लक्षात घेऊन एसटी महामंडळाने मागील काही वर्षांच्या तुलनेत जादा गाड्या सोडण्याचा निर्णय घेतला आहे. या दोन्ही ठिकाणांच्या गाड्यांचे आगाऊ आरक्षण सुरू झाले आहे. त्यामुळे प्रवाशांनी नजीकच्या आगारावर जाऊन आरक्षण करावे, असे आवाहन एसटी महामंडळाने केले आहे.
---

श्रावणात भाविक देवदर्शनासाठी मोठ्या संख्येने विविध मंदिरांमध्ये जातात. त्र्यंबकेश्‍वर आणि भीमाशंकर येथे ज्योतिर्लिंग असल्याने त्यासाठी जादा गाड्या सोडण्यात येतील. प्रवाशांनी या सुविधेचा लाभ घ्यावा.
- अरुण सिया, विभाग नियंत्रक, पुणे विभाग
-----