गुन्हे वृत्त

गुंतवणुकीतून ५७ लाखांची फसवणूक

पिंपरी : गुंतवणुकीवर जादा परताव्याचे आमिष दाखवून ५७ लाखांची फसवणूक करण्यात आली. हा प्रकार पिंपरी येथे घडला.
या प्रकरणी टी. चिंटु सुबुधी (रा. पिंपरी) यांनी सायबर पोलिसांत फिर्याद दिली आहे. त्यानुसार पोलिसांनी शिवम संवत्सरकार (वय ३३, रा. एरंडवणा पुणे) याला अटक केली आहे. तर, रवीकुमार शर्मा याच्यासह इतरांवर गुन्हा दाखल करण्यात आला आहे. फिर्यादीला गुंतवणुकीवर जास्त परतावा देण्याचे आमिष दाखवून त्यांचा विश्वास संपादन केला. गुंतवलेले पैसे काढण्यासाठी पैसे भरण्यास भाग पाडले. त्यांना एका ॲपवर रजिस्ट्रेशन करण्यास सांगून आणि वेगवेगळ्या ब्रोकर्स बँक अकाउंटवर ५७ लाख ७० हजार ६७० रुपये गुंतवलेले पैसे परत केले नाहीत.

बसच्या धडकेत दुचाकीस्वाराचा मृत्यू

पिंपरी : बसने दिलेल्या धडकेत दुचाकीस्वाराचा मृत्यू झाला. ही घटना मोशी येथे पुणे-नाशिक महामार्गावर घडली.
बबलू नंदजी गुप्ता (वय ३७) असे मृत्यू झालेल्या दुचाकीस्वाराचे नाव आहे. या प्रकरणी सुरेश कदम (रा. मोशी) यांनी भोसरी एमआयडीसी पोलिस ठाण्यात फिर्याद दिली आहे. त्यानुसार पोलिसांनी बसचालक आसाराम बहीर (वय ५८, रा. तापकीरनगर, आळंदी देवाची) याच्यावर गुन्हा दाखल केला आहे. बनकरवस्ती येथे चालकाने बस भरधाव चालवली. दरम्यान, त्याच्या बसने धडक दिल्याने दुचाकी रस्त्यावर पडली. यामध्ये बबलू गुप्ता यांच्या डोक्यावरून बसचे चाक गेल्याने गंभीर जखमी होऊन त्यांचा मृत्यू झाला. तर, सुरेश कदम यांना गंभीर दुखापत झाली.

पिस्तूल बाळगल्याप्रकरणी युवकाला अटक
पिंपरी : बेकायदारित्या पिस्तूल बाळगल्याप्रकरणी युवकाला पोलिसांच्या खंडणी विरोधी पथकाने अटक केली. तर, दोघांवर गुन्हा दाखल झाला आहे. ही कारवाई थेरगाव येथे करण्यात आली. साहिल जाफर शेख (वय २२, रा. श्रीराम कॉलनी, वाकड) याला अटक करण्यात आली आहे. तर शुभम नावळे (रा. रा. क्रांती चौक, कवडेनगर, जुनी सांगवी) आणि तेजस निकम (रा. आदर्शनगर, नवी सांगवी) यांच्यावर गुन्हा दाखल झाला आहे. साहिल शेख याने हे पिस्तूल शुभम नावळे आणि तेजस निकम यांना दिले. पोलिसांनी पिस्तूल आणि काडतूस जप्त केले.