माजी नगरसेविकेच्या घरासमोर सराईत गुन्हेगाराची दहशत

पिंपरी, ता. २४ : महाराष्ट्र संघटित गुन्हेगारी नियंत्रण कायद्यांतर्गत (मकोका) झालेल्या कारवाईत कारागृहातून बाहेर आलेल्या सराईत गुन्हेगारासह त्याच्या साथीदाराने माजी नगरसेविकेच्या घराजवळ येऊन दहशत माजवली. नगरसेविकेच्या पतीला घराबाहेर पाठवा, असे म्हणत दोन दिरांना जातीवाचक शिवीगाळ केली. तसेच जिवे मारण्याची धमकी देत घराचे नुकसान केले. ही घटना निगडी - प्राधिकरण येथे घडली.
या प्रकरणी सुनील अभिमान घोलप (रा. यमुनानगर, निगडी) यांनी निगडी पोलिस ठाण्यात फिर्याद दिली आहे. त्यानुसार पोलिसांनी सराईत गुन्हेगार कमलेश दत्तात्रेय ढवळे (वय २८, रा. शिवपार्वती हाऊसिंग सोसायटी, सहयोगनगर, तळवडे) याला अटक केली आहे. फिर्यादी हे भाजपच्या माजी नगरसेविका कमल बापू घोलप यांचे दीर आहेत. आरोपींनी फिर्यादी आणि त्यांच्या भावाला उद्देशून जातीवाचक शिवीगाळ केली. फिर्यादी यांना उद्देशून ‘बापू घोलपला घराबाहेर पाठव; नाही तर घरात येऊन तुझा आणि तुझ्या भावाचा मर्डर करेन’, अशी धमकी दिली. आरोपीच्या साथीदाराने त्याच्या हातातील कोयत्याने घराच्या प्रवेशद्वारावर लावलेला फिर्यादीच्या भावाच्या नावाचा फलक आणि सीमा भिंतीवर लावलेल्या प्रकाश दिवे तोडून नुकसान केले.