नवी सांगवीत पती-पत्नीचा संशयास्पद मृत्यू

पिंपरी, ता. २४ : पती आणि पत्नीचा मृतदेह संशयास्पद अवस्थेत आढळला. यात पती गळफास घेतलेल्या अवस्थेत, तर पत्नी भिंतीला टेकून बसलेल्या अवस्थेत होती. ही घटना नवी सांगवीत शिवनेरी कॉलनी परिसरात गुरुवारी सकाळी उघडकीस आली.

श्‍याम जग्गू वाघेला (वय ५०) आणि राजश्री (वय ४५, रा. शिवनेरी कॉलनी) अशी मृतांची नावे आहेत. राजश्री यांच्या तोंडातून रक्तस्राव होत होता. सांगवीचे वरिष्ठ पोलिस निरीक्षक जितेंद्र कोळी यांनी दिलेल्या माहितीनुसार, ‘‘वाघेला दाम्पत्याला दोन विवाहित मुली आहेत. राजश्री या पिंपरीतील खासगी शाळेत शिक्षिका होत्या. तर, श्‍याम वाघेला हे रिअल इस्टेट कार्यालयात नोकरीला होते. दरम्यान, चारित्र्यावरील संशयावरून त्यांच्यात वारंवार वाद होत होते. बुधवारी रात्रीही दोघांमध्ये वाद झाला. राजश्री यांनी दोन्ही मुलींना फोनवरून ही माहिती दिली. दरम्यान, ‘‘सकाळी घरी येते’’ असे मुलींनी त्यांना सांगितले होते. त्यानुसार गुरुवारी सकाळी सातच्या सुमारास एक मुलगी आली. तिने दरवाजा ठोठावला, मात्र प्रतिसाद न मिळाल्याने इतर नातेवाईकांना बोलावले. दरवाजा तोडला असता बेडरूममध्ये दोघांचेही मृतदेह आढळले. पोलिसांनी मृतदेह उत्तरीय तपासणीसाठी ससून रूग्णालयात पाठवले आहेत.’’