‘सकाळ’तर्फे सात ऑगस्ट रोजी चिंचवडला ‘सोलफुल किशोर’

पिंपरी, ता. २५ ः प्रतिभावंत संगीतकार आणि गायक किशोर कुमार यांच्या ९६ व्या जन्मदिनानिमित्त ‘सकाळ माध्यम समूहा’तर्फे ‘सोलफुल किशोर’ या संगीत मैफलीचे आयोजन करण्यात आले आहे. सात ऑगस्ट रोजी सायंकाळी सहा वाजता चिंचवड येथील प्रा. रामकृष्ण मोरे प्रेक्षागृहात ही मैफील रंगणार आहे.
आपल्या सुमधुर आवाजाने चित्रपटसृष्टीवर आणि रसिकांच्या मनावर अधिराज्य गाजवणारे गायक म्हणजे स्वर्गीय किशोर कुमार. त्यांची वेगवेगळ्या शैलीतील गाणी आणि आवाजाचे आजही अनेकजण दिवाने आहेत. त्यांच्या आठवणींना उजाळा देण्यासाठी आयोजित या संगीत मैफलीत ‘रोते हुए आते है सब’, ‘गाता रहे मेरा दिल’, ‘जीवन से भरी तेरी आँखे’, ‘हे मैने कसम ली’, ‘अपनी तो जैसे तैसे’ अशी एकापेक्षा एक सरस गाणी सादर होणार आहेत. त्यांची अनेक गाणी आजही रसिकांच्या मनात रुंजी घालतात. त्यांच्या गीतांना आणि हिंदी चित्रपटगीतांच्या सुवर्णकाळालाही या कार्यक्रमातून उजाळा दिला जाणार आहे. किशोर कुमार यांची निवडक गाणी जितेंद्र भुरूक आपल्या सहकाऱ्यांसह सादर करतील. या मैफलीतून कलाकार किशोर कुमार यांना मानवंदना देतील. कार्यक्रम सशुल्क असून प्रवेशिका ‘बुक माय शो’वर उपलब्ध आहेत.
---
हे लक्षात ठेवा
काय? ः ‘सोलफुल किशोर’ संगीत मैफील
कधी? ः ७ ऑगस्ट २०२५, गुरुवार
केव्हा? ः सायंकाळी ६ वाजता
कुठे? ः प्रा. रामकृष्ण मोरे प्रेक्षागृह, चिंचवड
-----