गुन्हे वृत्त

सिमेंट एजन्‍सीच्या नावाखाली फसवणूक

पिंपरी : सिमेंट कंपनीची एजन्सी देण्‍याच्‍या नावाखाली एकाची फसवणूक करण्‍यात आली. ही घटना चऱ्होली येथे घडली. प्रशांत प्रकाश डोंगरे (रा. अभंग हाईट्स, चऱ्होली) असे फसवणूक झालेल्‍या तरुणाचे नाव असून या प्रकरणी त्यांनी दिघी पोलिस ठाण्‍यात फिर्याद दिली आहे. त्यानुसार, पोलिसांनी चार जणांवर गुन्‍हा दाखल केला आहे. आरोपीने वैभव त्रिवेदी असल्याचे सांगून तुम्‍ही एका सिमेंट कंपनीची एजन्‍सी घेण्‍यासाठी नोंदणी केली आहे का, अशी विचारणा केली. फिर्यादी यांनी हो म्‍हणून सांगितल्‍यावर आरोपीने रजिस्ट्रेशन फी आणि डिपॉझिट म्‍हणून एकूण एक लाख ३८ हजार ५०० रुपये मागितले. फिर्यादी यांनी पैसे दिल्‍यावर फोन बंद केला. फिर्यादी यांनी वारंवार संपर्क केला असता आरोपीने तुम्‍ही ऑर्डर करा, पैसे भरा, मी वस्‍तू पाठवितो, असे सांगून आणखी पैशाची मागणी केली.

मारहाण प्रकरणी एकाला अटक
पिंपरी : फोन करण्‍यासाठी दिलेला मोबाईल परत मागितल्‍याच्‍या कारणावरून एकाने दांडक्‍याने मारहाण केली. ही घटना हिंजवडीतील साखरे वस्‍ती येथे घडली. अतुल साखरे (वय ३५, रा. साखरे वस्ती, हिंजवडी) असे अटक केलेल्‍या आरोपीचे नाव आहे. तर मुखलालराम जगदीश भुइयां (रा. साखरे वस्ती, हिंजवडी, मूळ- झारखंड) असे या घटनेत जखमी झालेल्‍या मजुराचे नाव असून त्‍यांनी हिंजवडी पोलिस ठाण्‍यात फिर्याद दिली आहे. आरोपीने फोन करण्‍यासाठी फिर्यादी यांचा फोन घेतला. फिर्यादीने मोबाईल परत मागितला असता आरोपीने शिवीगाळ करीत दांडक्‍याने फिर्यादीच्या हातावर मारहाण केली. भांडण सोडविण्‍यासाठी आलेल्‍या सागर व आयबु गायकवाड यांनाही शिवीगाळ करून हाताने मारहाण केली.

ट्रकखाली सापडून तरुणीचा मृत्यू
पिंपरी : भरधाव ट्रकने दुचाकीला धडक दिल्यानंतर दुचाकीस्‍वार तरुणी ट्रकच्या चाकाखाली सापडल्याने तरुणीचा मृत्यू झाला. ही घटना दापोडी मेट्रो स्‍थानकाजवळ घडली. अपेक्षा अशोक थोरात असे ‍मृत तरुणीचे नाव आहे. या प्रकरणी तिचे वडील अशोक थोरात (रा. खांदवेनगर, लोहगाव, पुणे) यांनी दापोडी पोलिस ठाण्‍यात फिर्याद दिली आहे. त्यानुसार, पोलिसांनी अज्ञात ट्रक चालकावर गुन्‍हा दाखल केला आहे. अपेक्षा या जुन्या पुणे- मुंबई महामार्गाने जात असताना दापोडी मेट्रो स्थानकाजवळ पाठीमागून आलेल्या ट्रकने त्यांच्‍या दुचाकीला जोरात धडक दिली. त्यामध्ये अपेक्षा खाली पडल्याने ट्रकचे पुढील त्यांच्या अंगावरून गेले.