पिंपरी रेल्वे स्थानकात चोरट्यांनी वायर कापली

सकाळ वृत्तसेवा
पिंपरी, ता. २६ ः पिंपरी रेल्वे स्थानकात घुसून चोरट्यांनी विद्यूत पुरवठा करणारी ‘ओव्हरहेड वायर’ (ओएचइ) कापली. परिणामी शनिवारी (ता. २६) सकाळी पुणे-मुंबई या दोन्ही मार्गांवरील रेल्वे वाहतूक सुमारे तीन तास ठप्प झाली.
शनिवारी पहाटे साडेतीनच्या सुमारास चोरट्यांनी पादचारी पुलावरून सुमारे ४२ फूट वायर कापली. ती जवळच्या झाडात टाकून चोरटे पळून गेले. सकाळी साडेसहाच्या सुमारास रेल्वे कर्मचाऱ्यांनी दुरुस्ती केली. त्यानंतर रेल्वे सेवा सुरळीत झाली. पुणे-मुंबई रेल्वे मार्ग अतिशय व्यस्त असतो. रोज दीडशेहून जास्त एक्स्प्रेस येथून जातात. याशिवाय पुणे-लोणावळा आणि तळेगाव दरम्यान लोकलच्या ४२ फेऱ्या होतात. या प्रकारामुळे रेल्वेचे वेळापत्रक विस्कळित झाले.

प्रवाशांना मनस्ताप

या प्रकारामुळे मुंबईकडे जाणारी सिद्धेश्‍वर एक्स्प्रेस पिंपरी रेल्वे स्थानकाच्या अलीकडे थांबून होती. हुबळी एक्स्प्रेस खडकी स्थानकाजवळ थांबविणे भाग पडले होते. या दोन्ही गाड्यांना तीन ते साडेतीन तास उशीर झाला. रेल्वे कर्मचारी व्यवस्थित माहिती देत नसल्याने प्रवाशांना मनस्ताप झाला. अखेर दुरुस्तीनंतर या दोन्ही गाड्या मार्गस्थ झाल्या.

सुरक्षेवरच प्रश्‍नचिन्ह

चोरट्यांनी रेल्वे स्थानकात घुसून पादचारी पुलावर जाऊन हे कृत्य केले. सुमारे २५,००० व्होल्टचा विद्युत पुरवठा करणारी वायर चोरटे कापेपर्यंत रेल्वे स्थानकातील रेल्वे सुरक्षा बलाच्या (आरपीएफ) जवानांना पत्ता नव्हता. त्यावेळी स्थानकात जवान होते की नाही, असाच प्रश्‍न उपस्थित होत आहे. या पार्श्वभूमीवर रेल्वेच्या मालमत्तेच्या सुरक्षेवर प्रश्‍नचिन्ह उपस्थित झाले आहे.
------
अधिकाऱ्याकडून उडवाउडवी
याबाबत माहिती घेण्यासाठी पुणे विभागाचे रेल्वे जनसंपर्क अधिकारी हेमंतकुमार बेहरा यांच्याशी संपर्क साधला असता, ‘सकाळी ओव्हरहेड वायर तुटली होती. याबाबत मला जास्त काही माहिती नाही. सिद्धेश्‍वर एक्स्प्रेसला उशीर झाला असेल. तुम्ही रेल्वेचे ॲप डाऊनलोड करून सकाळी कोणत्या रेल्वे जातात ते तपासा. तुम्हाला ऑनलाइन माहिती मिळेल,’ अशी उडवाउडवीची उत्तरे दिली.
-----