बेपत्ता अधिकाऱ्याचा खून झाल्‍याचे उघड

पिंपरी, ता. २६ : ताथवडे येथील एका कंपनीत प्रशासकीय प्रमुख म्हणून रुजू झालेल्या अधिकाऱ्याचा खून झाल्याचे उघडकीस आले. शानू रफिक मोहम्‍मद शेख (वय ४५, रा. विलेपार्ले, मुंबई) असे मृताचे नाव आहे. बडोद्याहून बदली झाल्यानंतर ते रुजू झाले होते. १७ जुलै रोजी कामावरील पहिल्याच दिवसानंतर ते बेपत्ता झाले होते. दुसऱ्या दिवशी ते कामावर आले नाहीत. त्यामुळे १९ जुलै रोजी वाकड पोलिस ठाण्यात तक्रार नोंदविण्यात आली होती. पोलिसांनी याप्रकरणी शरद गौतम घरद (वय ३६, रा. विजयनगर, काळेवाडी) याला अटक केली. त्याचा साथीदार गिरिधर वाल्मिक रेडे (रा. मोई, खेड) फरार आहे. दरम्‍यान, १९ तारखेला लोणीकंद पोलिस ठाण्‍याच्‍या हद्‌दीत भीमा नदीपात्रात एक मृतदेह आढळला. हा मृतदेह शेख यांचा असल्‍याचे निष्पन्न झाले. त्यानंतर गुन्हे शाखा युनिट चारच्या पथकाने तांत्रिक विश्लेषणावरून घरदला ताब्यात घेतले. कसून चौकशीत त्याने रेडेच्या साथीत खुनाची कबुली दिली. पुढील तपासासाठी गुन्‍हा वाकड पोलिसांकडे वर्ग करण्‍यात आला.
---------