शहरात डेंगीचे १६ तर मलेरियाचे ६ रुग्ण

शहरात डेंगीचे १६; मलेरियाचे ६ रुग्ण
संशयितांची संख्या पोहोचली ४६१ वर

पिंपरी, ता. २७ : पिंपरी चिंचवड शहरात जुलैमध्ये आतापर्यंत डेंगीचे १६ रुग्ण आढळले आहेत. तर, संशयितांची संख्या ४६१ वर गेली आहे. तर, मागील २७ दिवसांत मलेरियाचे सहा रुग्ण आढळले आहेत. जून ते १० जुलैपर्यंत शहरात डेंगीचे केवळ चार रुग्ण आढळून आले होते. मात्र, त्यात १२ जणांची भर पडली आहे.
शहरात गेल्या पंधरा दिवसांत डेंगीची रुग्णसंख्या तीन पटींनी वाढल्याचे महापालिकेकडून मिळालेली आकडेवारी सांगते. दरम्यान, मलेरियाचे आठ हजार ६३९ संशयित आढळून आलेले आहेत. त्यामुळे शहरातील नागरिकांनी काळजी घेण्याचे आवाहन केले जात आहे,
कीटकजन्य आजारांना रोखण्यासाठी पिंपरी चिंचवड महापालिकेकडून गेल्या महिन्यापासूनच प्रतिबंधात्मक मोहीम हाती घेण्यात आली आहे. या अंर्तगत आतापर्यंत पाच लाखांपेक्षा अधिक ठिकाणांची तपासणी करण्यात आली आहे. तर, २८ लाखांपेक्षा अधिक कंटेनर तपासणी करण्यात आली आहे. याशिवाय भंगार दुकाने, बांधकामाची स्थळे यांचीही पाहणी केली जात आहे. या संपूर्ण तपासणीत डासोत्पतीसाठी कारणीभूत ठरणाऱ्या नागरिक व आस्थापनांकडून २२ लाखांपेक्षा अधिक दंडही वसूल करण्यात आला आहे. मात्र, कार्यवाही करूनही डेंगीच्या रुग्णांमध्ये वाढ दिसून येत आहे.