देहूरोड कॅन्टोन्मेंट बोर्डाचा महापालिकेत समावेश करा

जाहिरात विभाग
--

पिंपरी, ता. २८ ः पुणे आणि खडकी कॅन्टोन्मेंट बोर्डाचा पुणे महापालिकेत समावेश झाला. त्याप्रमाणे देहूरोड कॅन्टोन्मेंट बोर्डाचा पिंपरी-चिंचवड महापालिकेत समावेश करावा, अशी मागणी खासदार श्रीरंग बारणे यांनी संरक्षण मंत्री राजनाथ सिंह यांच्याकडे केली.
याबाबत राज्य शासनाकडून प्रस्ताव आल्यास देहूरोडचा महापालिकेत समावेश करण्याची ग्वाही त्यांनी दिल्याचे बारणे यांनी सांगितले. बारणे यांनी दिल्लीत राजनाथ सिंह यांची भेट घेतली. यावेळी खासदार नरेश म्हस्के उपस्थित होते.
बारणे यांनी निवेदनात म्हटले आहे की, ‘परिसरातील नागरिकांना मूलभूत सुविधा पुरविण्यात देहूरोड कॅन्टोन्मेंट बोर्ड कमी पडत आहे. देहूरोड छावणी ऐतिहासिक आहे. ती सैन्य, नागरिकांसाठी काम करीत आहे. गेल्या काही वर्षांपासून नागरिकरण वाढले आहे. लोकसंख्या वाढत असून नागरी सुविधांची मागणी वाढली आहे. सद्यःस्थितीत कॅन्टोन्मेंट बोर्डाला पुरेशा प्रमाणात सुविधा देणे अशक्य आहे. त्यामुळे देहूरोडचे पिंपरी-चिंचवड महापालिकेत विलीनीकरण अत्यंत आवश्यक आहे. त्यातून नागरिकांना दर्जेदार सुविधा मिळतील. पाणी, कचरा, वीज, ऑनलाइन सेवा मिळतील. देहूरोड भौगोलिककदृशष्ट्या पिंपरी-चिंचवडपासून जवळ आहे. देहूरोड छावणी आर्थिक संकटांचा सामना करीत आहे. केंद्र सरकारकडून अपेक्षित आर्थिक साहाय्य मिळत नाही. त्यामुळे नियोजित विकास होत नाही. नागरिकांना मूलभूत सुविधा मिळत नाहीत. देहूरोडमधील नागरिकांचीही महापालिकेत समावेश करण्याची मागणी आहे. त्यामुळे देहूरोड कॅन्टोन्मेंट बोर्डाचा पिंपरी-चिंचवड महापालिकेत समावेश करावा.’
--