पिंपरीत धर्मांतराचा प्रयत्न

पान एकसाठी

पिंपरी, ता. २८ : ‘या’ धर्मात प्रवेश केल्यास तुम्हाला सुख, शांती, संपत्ती तसेच मानसिक स्वास्थ्य मिळेल, असे सांगून धर्मांतराचा प्रयत्न करणाऱ्या अमेरिकन नागरिकासह दोघांना पिंपरी पोलिसांनी अटक केली. एका अल्पवयीन मुलाला आईच्या ताब्यात देण्यात आले. हा प्रकार पिंपरी कॅम्प परिसरात घडला.
याप्रकरणी सनी बन्सीलाल दनानी (रा. वैष्णोदेवी मंदिराजवळ, पिंपरी) यांनी फिर्याद दिली. त्यानुसार पोलिसांनी शेफर जॅविन जेकॉब (वय ४१, सध्या रा. मुकाई चौकाजवळ, रावेत, मुळ रा. कॅलिफोर्निया, अमेरिका), स्टीव्हन विजय कदम (वय ४६, रा. उद्यमनगर, अजमेरा, पिंपरी) या दोघांना अटक केली. जेकॉब हा व्यावसायिक व्हिसावर भारतात आला आहे. स्टीव्हन आणि एका अल्पवयीन मुलासह शेफर रविवारी सनी यांच्या घरी आले. त्यांनी सांगितले की, एका धर्मात प्रवेश केल्यास तुम्हाला सारे काही या विश्वात केवळ ‘तो’ एकच देव आहे. इतर देव व धर्म हे केवळ कथा आहेत. इतर देवी देवतांना न मानता तुम्ही ‘त्या’ देवाला देव माना. धर्म परिवर्तन केल्यास आम्ही तुम्हाला भविष्यात आर्थिक साहाय्य करू.
आरोपींनी सनी यांच्यावर दबाव आणून त्यांच्या धर्माचा व धार्मिक श्रद्धेचा अवमान करून धार्मिक भावना दुखावल्या. पोलसांनी या आरोपींच्या ताब्यातून दोन मोबाईल जप्त केले आहे. त्यांना न्यायालयात हजर करण्यात आले. त्यांना दोन दिवसांची पोलिस कोठडी देण्यात आली.
दरम्यान, या प्रकाराबाबत आमदार उमा खापरे यांनी पोलिस आयुक्तांना निवेदन देत पुढील कारवाई होण्यासाठी पाठपुरावा केला होता.
-----------------