मावळातील ४५ पत्रकारांची आरोग्य तपासणी

सोमाटणे, ता. २९ : पवना मेडिकल फाउंडेशन, सोमाटणे यांच्या वतीने मावळ तालुक्यातील पत्रकारांसाठी आरोग्य तपासणी व उपचार शिबिराचे आयोजन करण्यात आले. या शिबिरात एकूण ४५ पत्रकारांनी सहभाग घेतला.
पोलिस, शिक्षक आणि पत्रकार हे समाजासाठी काम करणारे महत्त्वाचे घटक असल्याने त्यांचे आरोग्य टिकवणे गरजेचे आहे, या सामाजिक बांधीलकीतून दरवर्षी या शिबिराचे आयोजन करण्यात येते. आज मावळातील पत्रकारांचे आरोग्य तपासणी शिबिर घेण्यात आले. या शिबिरात रक्तदाब, मधुमेह, हृदयविकार तसेच इतर आरोग्य समस्यांची तपासणी तज्ज्ञ डॉक्टरांकडून करण्यात आली. सोमाटणे, चांदखेड, पवनानगर, लोणावळा, कामशेत, वडगाव, तळेगाव, इंदोरी आदी भागांतून वयाच्या २५ ते ७० वयोगटातील पत्रकारांनी शिबिरात सहभाग घेतला.
शिबिरादरम्यान ‘स्वतःचे आरोग्य चांगले राखण्यासाठी कोणते प्राथमिक उपाय आवश्यक आहेत व ते कसे पाळावेत’, यावर डॉ. प्रतीक वाढोकर व डॉ. वर्षा वाढोकर यांनी मार्गदर्शन केले. तपासणीदरम्यान काही आजारांचे निदान झाल्यास त्यावर तातडीने उपचार करण्यात येतील, असे आश्वासन डॉ. वर्षा वाढोकर यांनी दिले.
----