गुन्हे वृत्त

खंडणीसाठी टोळक्याकडून
व्यावसायिकाला धमकी

पिंपरी : टोळक्याकडून एका नारळ विक्रेत्याला कोयत्याने तसेच बिअरच्या बाटलीने धमकावण्यात आले. हा प्रकार काळेवाडीतील नढेनगर येथे घडला. या प्रकरणी बसवराज मलाप्पा घोडके (रा. ज्योतिबानगर, काळेवाडी) यांनी पोलिस ठाण्यात फिर्याद दिली आहे. त्यानुसार वैभव नांजरकर (वय ३२, रा. सूर्यकिरण कॉलनी, ज्योतिबानगर, काळेवाडी) आणि इतर आठ जणांवर गुन्हा दाखल झाला आहे. आरोपी वैभव याने फिर्यादीला फोन करून ‘तू नारळाचा व्यवसाय करतोस आणि तुझ्या गाड्या गोडाऊनसमोर लावतोस, त्यासाठी खंडणी म्हणून साडेतीन लाख रुपये द्यावे लागतील,’ असे सांगितले. आरोपी वैभव याने ऑनलाइन माध्यमातून ९० हजार रुपये घेतले. त्याने फिर्यादीच्या गोडाऊनच्या गेटवर दगड मारून आणि ॲक्वा प्लांटचे नळ तोडून नुकसान केले आहे. इतर आरोपींनी फिर्यादीला लोखंडी कोयत्याचा धाक दाखवून धमकाविण्याचा प्रयत्न केला. त्यानंतर फिर्यादीला मोटारीतून गोडाऊनच्या आतमध्ये जबरदस्तीने नेले आणि फिर्यादीला शिवीगाळ करून पैशांची मागणी केली. पैसे न दिल्यास जिवे ठार मारण्याची धमकी दिली. त्यानंतर एका आरोपीने हातातील बिअरची बाटली फिर्यादीच्या दिशेने उगारून ‘आताच पैसे दे नाहीतर तुला बघून घेऊ’ अशी धमकी दिली. त्यानंतर इतरही आरोपी तेथे आले. त्यांनी ‘वैभव सांगतो त्याप्रमाणे पैसे दे नाहीतर तुला आम्ही खल्लास करू,’ अशी धमकी दिली.

बसच्या धडकेत बारा वर्षीय मुलगा जखमी
पिंपरी : भरधाव बसने मोटारीला दिलेल्या धडकेत बारा वर्षीय मुलगा जखमी आला. ही घटना मोशीतील स्पाईन चौक येथे घडली. शमित गायकवाड (वय १२) असे या अपघातात जखमी झालेल्या मुलाचे नाव आहे. याप्रकरणी मनीष सुभाष गायकवाड (रा. स्वराज रेसिडेन्सी, मोशी) यांनी एमआयडीसी भोसरी पोलिस ठाण्यात फिर्याद दिली आहे. त्यानुसार अज्ञात बसचालकावर गुन्हा दाखल आला आहे. फिर्यादी मनीष, त्यांची पत्नी आणि मुलगा शमित हे मोटारीतून स्पाइन रस्त्याने जात असताना, चिखली बाजूकडून आलेल्या बसने मोटारीला डाव्या बाजूच्या मागील दरवाजास धडक दिली. या अपघातात मुलगा शमित याच्या खांद्याला व मानेला दुखापत झाली. तसेच मोटारीचे नुकसान झाले आहे.

पिस्तूल बाळगल्याप्रकरणी एकाला अटक
पिंपरी : बेकायदारित्या पिस्तूल आणि जिवंत काडतुसे बाळगल्याप्रकरणी एकाला अटक करण्यात आली. ही कारवाई पिंपळे निलख येथील विशाल नगर येथे करण्यात आली. कुणाल शिवाजी पुरी (वय २०, रा. धायरी, पुणे) असे अटक केलेल्या आरोपीचे नाव आहे. आरोपीकडे पिस्तूल असल्याची माहिती गुन्हे शाखेच्या युनिट चारच्या पथकाला मिळाली. त्यानुसार पथकाने सापळा रचून कुणाल पुरी याला ताब्यात घेत त्याच्याकडून ५१ हजार रुपये किमतीचे एक पिस्तूल आणि एक जिवंत काडतूस जप्त केले. सांगवी पोलिस अधिक तपास करीत आहेत.