नाल्यावरील बांधकामे ‘एमआयडीसी’ने पाडली

पिंपरी, ता. ३० ः हिंजवडी फेज दोनमध्ये नाल्यावर बांधण्यात आलेल्या इमारतीवर महाराष्ट्र औद्योगिक विकास महामंडळाने अखेर हातोडा मारला आहे. संबंधित इमारतीचा नाल्यावर असलेला भाग काढून येत आहे. ही कारवाई पुढील दोन दिवस चालणार असल्याची माहिती एमआयडीसीने दिली.
हिंजवडीतील राजीव गांधी आयटी पार्क आणि परिसरातील अनधिकृत बांधकामे व अतिक्रमणांवर गेल्या काही आठवड्यापासून पीएमआरडीए तसेच एमआयडीसीच्या वतीने कारवाई करण्यात येत आहे. यामध्ये एमआयडीसीने आत्तापर्यंत ५३ हून अधिक अतिक्रमणांवर कारवाई केली आहे. मात्र, नाल्यावरील बांधकामावर केलेली ही आतापर्यंतची सर्वात मोठी कारवाई मानली जात आहे.
हिंजवडी फेज दोनमधील डोहलर कंपनीच्या समोरील भूखंड एमआयीडीसीने बांधकाम व्यावसायिकाला लिलावाद्वारे विकला होता. मात्र, येथून जाणाऱ्या नाल्यावरही बांधकाम केल्याचे गेल्या महिन्यात निदर्शनास आले होते. या बांधकामामुळे येथील नाल्याचा नैसर्गिक प्रवाह अडविण्यात आल्याने गेल्या महिन्यात झालेल्या पावसात याठिकाणी मोठ्या प्रमाणावर पाणी साचले होते. नाल्यांचे प्रवाह अडविण्यात आल्याचे निदर्शनास आल्यानंतर बांधकाम करणाऱ्या व्यावसायिकाला नोटीसही बजावण्यात आली होती. मात्र, कोणतीही प्रत्यक्ष कारवाई झाली नव्हती. दरम्यान सध्या ही कारवाई सुरू करण्यात आली असून, नाल्याचा प्रवास सुरळीत करण्यासाठी ४० टक्के काम काढण्यात येणार असल्याचे एमआयडीसीने सांगितले आहे.

‘सकाळ’चा पाठपुरावा
हिंजवडीतील जलकोंडी आणि त्यासाठी कारणीभूत असलेल्या बाबी ‘सकाळ’ने वारंवार आपल्या वृत्तामधून मांडल्या होत्या. तसेच विविध समस्यांवरही आपल्या ‘सकाळ’ सातत्याने पाठपुरावा करत आहे. पंधरा दिवसांपूर्वी उपमुख्यमंत्री अजित पवार यांनीही समस्या सोडविण्यासाठी अधिकाऱ्यांना कार्यवाही करण्याची मोकळीक दिली होती.

गेल्या काही दिवसांपासून हिंजवडीतील अतिक्रमणांवर कारवाई करण्यात येत आहे. डोहलर कंपनीच्या समोर सुरू असलेले संबंधित बांधकाम नैसर्गिक प्रवाह अडवत असल्याचे पाहणीतून पुढे आले होते. त्यानुसार संबंधितांना याबाबत नोटीसही बजावली होती. सध्या हे अतिक्रमण काढण्याचे काम सुरू आहे.
- नितीन वानखेडे, मुख्य अभियंता