ओढ्या-नाल्यावरील बेकायदा इमारतींवर हातोडा

पिंपरी/ हिंजवडी, ता. ३० ः हिंजवडी फेज दोन आणि तीनमध्ये नैसर्गिक ओढे- नाल्यावर बांधण्यात आलेल्या बेकायदा इमारतींवर राज्य औद्योगिक विकास महामंडळाने अखेर हातोडा मारला. त्यामध्ये फेज तीनमधील बहुचर्चित डॉल्फिन कॉम्प्लेक्स अखेर जमीनदोस्त करण्यात आले.
गेल्या काही आठवड्यांपासून हिंजवडीतील राजीव गांधी आयटी पार्क आणि परिसरातील अनधिकृत बांधकामे व अतिक्रमणांवर पीएमआरडीए तसेच एमआयडीसीच्यावतीने कारवाई करण्यात येत आहे. त्यामध्ये एमआयडीसीने आतापर्यंत ५३ हून अधिक अतिक्रमणांवर कारवाई केली आहे. मात्र, फेज दोनमधील नाल्यावरील बांधकामावर केलेली ही आतापर्यंतची सर्वात मोठी कारवाई मानली जात आहे. ही कारवाई पुढील दोन दिवस चालणार असल्याची माहिती एमआयडीसीने दिली.
हिंजवडी फेज दोनमधील डोहलर कंपनीच्या समोरील भूखंड एमआयीडीसीने बांधकाम व्यावसायिकाला लिलावाद्वारे विकला होता. मात्र, गेल्या महिन्यात येथून जाणाऱ्या नाल्यावरही बांधकाम केल्याचे निदर्शनास आले होते. या बांधकामामुळे येथील नाल्याचा नैसर्गिक प्रवाह अडविण्यात आल्याने पावसात तेथे मोठ्या प्रमाणावर पाणी साचले होते. या प्रकरणी संबंधित बांधकाम व्यावसायिकाला नोटिसही बजावण्यात आली होती. मात्र, कोणतीही प्रत्यक्ष कारवाई झाली नव्हती. दरम्यान, सध्या ही कारवाई सुरू करण्यात आली असून नाल्याचा प्रवास सुरळीत करण्यासाठी ४० टक्के काम काढण्यात येणार असल्याचे एमआयडीसीने सांगितले आहे.

डॉल्फिन कॉम्प्लेक्स
आयटी पार्क फेज तीनमधील नैसर्गिक ओढ्यावर बांधलेल्या बेकायदा तीन मजली डॉल्फिन नावाच्या व्यावसायिक इमारतीवर एमआयडीसीने कारवाईला सुरुवात केली आहे. त्यामुळे गेल्या चार दिवसांपासून इमारतीच्या मालकाकडून ओढ्यावरील हे बांधकाम स्वतःहून काढण्याचे काम सुरू आहे. हे बांधकाम पूर्णपणे पाडून होताच येथील पाण्याचा नैसर्गिक प्रवाह पुढील प्रमाणे प्रवाहित होणार आहे. महालक्ष्मी प्रमोटर्सचे तळमजला - प्लस दोन मजले अशी रचना या व्यावसायिक संकुलाची आहे. या इमारतीचा पाचशे चौरस मीटर क्षेत्रफळाचा नकाशा एमआयडीसी प्रशासनाने मंजूर केला होता. मात्र, विकसकाने ओढ्यावर बेकायदा बांधकाम केले. दरम्यान आयटी पार्क हिंजवडी-माणमधील रस्ते पाण्याखाली गेल्याने येथील नैसर्गिक ओढे-नाले बुजून त्यावर बांधकाम केल्याचा मुद्दा समोर आला. उपमुख्यमंत्री अजित पवार यांनी त्यांच्या दोन पाहणी दौऱ्यात ही बांधकामे पाडण्याच्या सक्त सूचना दिल्या होत्या.

‘सकाळ’चा पाठपुरावा
हिंजवडीतील जलकोंडी आणि त्यासाठी कारणीभूत असलेल्या बाबी ‘सकाळ’ने वारंवार आपल्या वृत्तांमधून मांडल्या होत्या. तसेच विविध समस्यांवरही ‘सकाळ’ सातत्याने पाठपुरावा करत आहे. पंधरा दिवसांपूर्वी उपमुख्यमंत्री अजित पवार यांनीही समस्या सोडविण्यासाठी अधिकाऱ्यांना कारवाई करण्याची मोकळीक दिली होती.

गेल्या काही दिवसांपासून हिंजवडीतील अतिक्रमणांवर कारवाई करण्यात येत आहे. डोहलर कंपनीच्या समोर सुरू असलेले संबंधित बांधकाम नैसर्गिक प्रवाह अडवत असल्याचे पाहणीतून पुढे आले होते. त्यानुसार संबंधितांना याबाबत नोटीसही बजावली होती. सध्या हे अतिक्रमण काढण्याचे काम सुरू आहे.
- नितीन वानखेडे, मुख्य अभियंता,