पवनमावळातील रस्त्यांवर सततच्या पावसामुळे खड्डे

सोमाटणे, ता. ५ : सततच्या पावसामुळे पवनमावळातील रस्त्यांवर खड्डे पडले असून, वाहनचालकांना मोठी कसरत करावी लागत आहे.
यावर्षी मावळात पंधरा मेपासूनच पावसाला सुरुवात झाली. पवनमावळ पूर्व भागात गेल्या दोन दशकांचा रेकॉर्ड मोडणारा पाऊस पडला आहे. यामुळे सार्वजनिक बांधकाम विभागाने केलेले सोमाटणे ते परंदवडी, परंदवडी ते कडधे, आढले ते आढले फाटा, चांदखेड ते पाचाणे फाटा, कुसगाव ते पाचाणे, कासारसाई धरण सेवा रस्ता, शिरगाव ते गहुंजे, दारुंब्रे ते सांगवडे आदी रस्त्यांची दुरवस्था झाली आहे.
खड्डे आणि उखडलेला डांबर यामुळे रस्त्यावर मोठमोठे खड्डे पडले आहेत. या खड्ड्यांमध्ये पाणी साचल्यामुळे वाहनचालकांना त्यांची खोली जाणवत नाही, ज्यामुळे दुचाकीस्वारांचे अपघात होत आहेत. तर, चारचाकी वाहनधारकांना मोठी कसरत करावी लागत आहे. खड्ड्यांमुळे सर्वाधिक त्रास नियमित प्रवास करणारे शालेय विद्यार्थी, व्यापारी आणि दूध विक्रेत्यांना होत आहे. रस्त्यावरील अपघात टाळण्यासाठी संबंधित विभागाने तातडीने या खड्ड्यांची दुरुस्ती करण्याची मागणी बाळासाहेब केदारी यांनी केली आहे.
---