महापालिकेचा ‘डीपी’ मराठीत करण्याचा आदेश

पिंपरी, ता. ३१ : महापालिकेचा विकास आराखडा (डीपी) मराठीत प्रसिद्ध करण्याचा आदेश राज्याचे अप्पर सचिव प्रणव कर्पे यांनी आयुक्त शेखर सिंह यांना दिला आहे.

पिंपरी चिंचवड महापालिकेचा ‘डीपी’ १५ मे रोजी जाहीर करण्यात आला आहे. त्यावर १४ जुलैपर्यंत हरकती-सूचना मागवल्या होत्या. मात्र, ‘डीपी’ इंग्रजीत असल्यामुळे नागरिकांना अडचणी येत होत्या. याबाबत खासदार श्रीरंग बारणे यांनी उपमुख्यमंत्री एकनाथ शिंदे यांच्याकडे तक्रार केली होती. तसेच, विधिशाखेचे विद्यार्थी अनीश काळभोर, धनराज काळभोर, शुभम काळभोर, अथर्व पाटील यांनी २५० लोकांच्या हरकती जमा करून सरकारकडे दाद मागितली होती. ‘‘आमचा इंग्रजीला विरोध नसून मायबोली मराठीतही विकास आराखडा असणे जनतेच्या हिताचे आणि कायदा व भाषेचा आदर राखणारा असेल. त्यामुळे डीपीसह सर्व प्रशासकीय कागदपत्रे मराठीत असावेत,’’ अशी मागणी विद्यार्थ्यांनी केली होती. त्यावर हे आदेश देण्यात आले आहेत.
---