तब्बल ४३ हजार विद्यार्थी ‘आधार’ विना

आशा साळवी ः सकाळ वृत्तसेवा

पिंपरी, ता.३ ः विविध तांत्रिक अडचणी आणि आधार कार्डातील तपशील जुळत नसल्यामुळे शहरातील ४३ हजार ३६८ विद्यार्थ्यांचे आधार प्रमाणीकरण बाकी आहे. विशेषतः अंशतः अनुदानित आणि स्वयं अर्थसहाय्यित तत्त्वावरील शाळांनी अद्याप विद्यार्थ्यांचे आधार प्रमाणीकरण केली नसल्याची माहिती उपलब्ध आकडेवारी दिसून येत आहे. परिणामी, अशा शाळांची संच मान्यता कशी होणार, याकडे लक्ष लागले आहे.
शालेय शिक्षण विभागाने ‘स्टुडंटस् पोर्टल’वर विद्यार्थ्यांचे आधार प्रमाणीकरण करण्यासाठी २३ जुलैपर्यंत मुदत दिली होती. मात्र, ही मुदत उलटूनही विद्यार्थ्यांचे आधार प्रमाणीकरण अद्याप झालेले नाही. अनुदानाच्या कक्षेत येणाऱ्या शाळा-महाविद्यालयांमध्ये कार्यरत शिक्षकांच्या वेतन अनुदानासाठी संच मान्यता गरजेची आहे. त्या अनुषंगाने प्रक्रिया सुरू करण्यात आली आहे. शासनाच्या विविध शैक्षणिक योजनांचा लाभ ज्या विद्यार्थ्यांना दिला जातो. त्यांचे आधार कार्ड अद्ययावत करणे बंधनकारक आहे. त्यासाठी निर्धारित २३ जुलैपर्यंतच्या अंतिम मुदतीमध्ये महापालिका हद्दीतील शाळांमधील भोसरी विभागातील २१ हजार ४२५ आणि आकुर्डी विभागातील २१ हजार ९४३ टक्के विद्यार्थ्यांचे आधार प्रमाणीकरणाचे काम झाले आहे. त्याचबरोबर आधार कार्ड अद्ययावत न करणाऱ्या विद्यार्थ्यांना यापुढे अनुदान मिळणार नसल्याचे प्रशासनाकडून सांगण्यात आले आहे.

अनुदानास पात्र असलेल्या विद्यार्थ्यांना शालेय गणवेश, शालेय पोषण आहार त्याचबरोबर मोफत पाठ्यपुस्तके व अन्य सरकारी योजनांचा लाभ दिला जातो. त्यामुळे आधार कार्ड २३ जुलैपर्यंत अद्ययावत करणे आवश्यक होते. त्यानंतरच विद्यार्थ्यांना अनुदान वितरीत केले जाणार आहे. एनआयसी, पुणेकडील सरल प्रणालीतील ‘स्टुडंट पोर्टल’वर नोंदविल्या गेलेल्या शालेय विद्यार्थ्यांच्या आधार अद्ययावतीकरणाचे काम वेळोवेळी मुदतवाढ देऊनही शाळांकडून पूर्ण झालेले नाही. पिंपरी विभागातील ७० टक्के आणि आकुर्डी विभागातील ४४ टक्के शाळांकडून आधार प्रमाणीकरण झाले आहे.

काय आहेत अडचणी ?
- संकेतस्थळ वारंवार ‘हँग’ होणे
- अनेक पालकांमध्ये आधारविषयी जनजागृतीचा अभाव
- बऱ्याच पाल्यांचे आधार कार्डच काढणे बाकी
- अनेक विद्यार्थ्यांच्या नावाच्या स्पेलिंगमध्ये अडचण
- काही मुले स्थलांतरीत आहेत.

विद्यार्थ्यांचे आधार प्रमाणीकरण करताना अनेक अडचणी येत आहे. दिवसातून दोन ते तीनच विद्यार्थ्यांचे आधार कार्ड अद्ययावत होत आहेत. अशा विविध तांत्रिक अडचणींमुळे आधार कार्डातील तपशील जुळत नव्हते. त्यामुळे शिक्षक, पालकांसमोरील अडचणींचा डोंगर असताना अनेक शाळांनी प्रयत्न केले. स्वयं अर्थसहाय्यित तत्त्वावरील शाळांना आधार प्रमाणीकरण करण्याच्या सूचना केल्या आहेत.
- संगीता बांगर, प्रशासन अधिकारी, शिक्षण विभाग