महापालिका रुग्णालयांमध्ये जागतिक स्तनपान जागृती सप्ताहाचे आयोजन

महापालिका रुग्णालयांमध्ये स्तनपान जागृती सप्ताह

पिंपरी,ता. २ : शहरात महापालिकेच्या सर्व रुग्णालयांमध्ये जागतिक स्तनपान जागृती सप्ताह साजरा केला जात आहे. एक ते सात ऑगस्टदरम्यान आयोजित या कार्यक्रमांची सुरुवात पिंपरीतील यशवंतराव चव्हाण स्मृती रुग्णालयातून झाली.
इनर व्हील क्लब निगडी प्राइड व इंडियन अकादमी ऑफ पेडिएट्रिक यांच्या सहकार्याने आयोजित या कार्यक्रमाला यशवंतराव चव्हाण स्मृती रुग्णालयाचे अधिष्ठाता डॉ. राजेंद्र वाबळे, डॉ. ललितकुमार धोका, डॉ. मिलिंद सोनावणे, डॉ. उज्ज्वला अंदुरकर, डॉ. कमलजीत कौर, डॉ. शैलेजा भावसार आदींची प्रमुख उपस्थित होती.
बालरोग विभागप्रमुख डॉ. दीपाली अंबिके यांनी ‘बालकांसाठी स्तनपानाचे महत्त्व आणि फायदे’ याबाबत मार्गदर्शन केले. स्त्रीरोग तज्ज्ञ डॉ. मोनाली गव्हाणे यांनी ‘गरोदरपणातील तयारी व प्रसूतीनंतर नवजात बालकास स्तनपान’ करण्याबाबत मार्गदर्शन केले.
डॉ. राजेंद्र वाबळे यांनी ‘‘लवकरच वायसीएम रुग्णालयात लवकरच ह्युमन मिल्क बँक सुरू करण्यात येईल,’’ याबद्दल आश्वासन दिले. तसेच यावर्षीच्या सप्ताहाच्या ‘स्तनपानाला प्राधान्य व व शाश्वत स्तनपानासाठी पूरक आधार’ या घोषवाक्यानुसार समाजातील सर्व संस्थांनी आणि वायसीएमच्या सर्व कर्मचाऱ्यांनी स्तनपानाचे सातत्य टिकविण्याची व पूरक आधार देण्याची जबाबदारी घावी, असे आवाहन त्यांनी केले.
डॉ. मिलिंद सोनावणे व डॉ. लक्ष्मण गोफणे आणि व्यासपीठावरील सर्व प्रमुख मान्यवरांचे कार्यक्रम यशस्वी केल्याबददल आभार मानले. सूत्रसंचालन यशस्विता बाणखेले यांनी केले. या कार्यक्रमास गरोदर माता, स्तनदा माता व त्यांचे नातेवाईक आदींची उपस्थिती होती.
या उपक्रमासाठी इंडियन मेडिकल असोसिएशन पिंपरी चिंचवड भोसरी शाखा आणि पिंपरी चिंचवड महापालिका यांनी पुढाकार घेतला.