सनई वादन, प्रबोधन गीते अन् व्याख्यान

पिंपरी, ता. ३ ः सनई वादन, प्रबोधनपर गीते, व्याख्याने, गौरव गीतांतून मानवंदना आणि कलापथकाचे सादरीकरण अशा विविध कार्यक्रमांनी रसिकांना खिळवून ठेवले. निमित्त होते, साहित्यरत्न लोकशाहीर अण्णा भाऊ साठे जयंतीनिमित्त महापालिकेतर्फे निगडीत आयोजित विचार प्रबोधन पर्वाचे.
निगडीतील लोकशाहीर अण्णा भाऊ साठे स्मारक परिसरात हे कार्यक्रम झाले. प्रा. नितीन बानगुडे पाटील यांनी ‘लोकशाहीर साहित्यरत्न अण्णा भाऊ साठे ः एक थोर साहित्यिक’ या विषयावर व्याख्यान दिले. जनता संपर्क अधिकारी प्रफुल्ल पुराणिक, उत्सव समिती अध्यक्ष बाबासाहेब रसाळ, नाना कसबे, संजय ससाणे, अरुण जोगदंड, सतीश भवाळ आदी यावेळी उपस्थित होते.
पाटील म्हणाले, ‘‘समाजाच्या तळागाळातील लोकांचा आवाज व आदर्श ठरलेले अण्णा भाऊ साठे आजही त्यांच्या विचारांनी आणि कार्याने जिवंत आहेत. समाज परिवर्तन आणि सशक्त भारताच्या निर्मितीसाठी त्यांच्या लेखनाचा आणि विचारमूल्यांचा ठेवा नव्या पिढीपर्यंत पोचवण्याची गरज आहे. त्यांनी न्याय, हक्क, अधिकार, सामाजिक प्रबोधन, अंधश्रद्धा, रूढी-परंपरा, लोककला आदी विविध विषयांवर प्रभावी लेखन केले आहे. ते केवळ लेखक नव्हते, तर झुंजार विचारवंत होते. जगभरातील चळवळी, आंदोलने, श्रमिकांचे लढे यांच्याशी सुसंगत विचार त्यांनी आपल्या साहित्यातून व्यक्त केले आहेत.’’

प्रबोधनात्मक कार्यक्रम
पल्लवी घोडे आणि मोहम्मद रफी शेख यांनी प्रबोधनपर गीते सादर केली. विशाल मराठे यांचे ‘लहुजी वस्ताद साळवे ः एक थोर क्रांतिगुरू’ विषयावर व्याख्यान झाले. त्यांनी स्वातंत्र्यपूर्व चळवळीतील लहुजी वस्ताद साळवे यांच्या महत्त्वपूर्ण योगदानावर मार्गदर्शन केले. ‘साहित्यसम्राटास गीतातून अभिवादन’ कार्यक्रमात गायक धीरज वानखेडे यांनी लोकशाहीर अण्णा भाऊ साठे यांच्या जीवनावर आधारित गीते सादर केली. भाऊ बापू मांग कलापथक नारायणगावकर यांच्या १५ कलाकारांनी गीतगायन तसेच नृत्याद्वारे अण्णा भाऊंना अभिवादन केले.
--