मार्चमध्ये आठ ‘आरएमसी’ प्लॅंट बंद प्रदूषण नियंत्रण मंडळाची कारवाई ः सात प्लॅंटला नोटीस

पिंपरी, ता. ४ ः महाराष्ट्र प्रदूषण नियंत्रण मंडळाने मार्चमध्ये केलेल्या कारवाईत शहरातील आठ रेडीमिक्स कॉंक्रिट प्लॅंट सील केले असून, ७ आरएमसी प्लॅंटला नोटिसा बजावल्या आहेत. शहरातील वाढते प्रदूषण व धूळ यांचा परिणाम नागरिकांच्या आरोग्यावर होत आहे. शहरात ठिकठिकाणी उभारण्यात येणारे आरएमसी प्लॅंटमुळे धुलीकणांमध्ये भर पडत आहे. त्यामुळे प्रदूषण पातळीत दिवसेंदिवस वाढ होत आहे. याबाबत शहरातील नागरिकांनी प्रदूषण नियंत्रण मंडळाकडे अनेक तक्रारी केल्यानंतर ही कारवाई करण्यात आली.
शहरात रावेत, पुनावळे, ताथवडे, वाकड, हिंजवडी, मोशी, चऱ्होली, किवळे, देहूरोड या भागांमध्ये मोठ्या प्रमाणात बांधकामे सुरू आहेत. त्यांना आवश्‍यक कच्चा माल तयार करण्यासाठी ठिकठिकाणी आरएमसी प्लॅंट उभारण्यात येत आहेत. हे प्रकल्प उभारताना पिंपरी चिंचवड महापालिका व प्रदूषण नियंत्रण महामंडळाची परवानगी आवश्‍यक असते. याद्वारे नोंदणी झालेल्या आरएमसी प्लॅँट चालकांनी प्रदूषण नियंत्रण मंडळाच्या नियमावलीचे पालन करणे आवश्‍यक आहे. मात्र, शहरातील बहुतांश ‘आरएमसी’ कोणतेही नियम पाळताना दिसत नाहीत. त्यामुळे प्रदूषण नियंत्रण महामंडळाने शहरातील सर्व आरएमसी प्लॅंटचे सर्वेक्षण सुरू केले. यामध्ये नियम न पाळणाऱ्या ८ आरएमसी प्लॅंट बंद करण्यात आले. तर ७ आरएमसी प्लॅंटला नोटीस बजावली आहे. पुढील १५ दिवसांमध्ये या प्लॅंटनी प्रस्तावित निर्देशांचे पालन न केल्यास त्यांच्यावरही बंदीची कारवाई करण्याचा इशारा प्रदूषण नियंत्रण मंडळाने दिला आहे.

‘‘शहरातील वाढणारे प्रदूषण व त्यामुळे नागरिकांना होणारा त्रास याबाबत आमच्याकडे वारंवार तक्रारी येत आहेत. त्यामुळे मार्चपासून आम्ही शहरातील आरएमसी प्लॅंटचे सर्वेक्षण सुरू केले आहे. यामध्ये नियमांचे उल्लंघन करणाऱ्या आरएमसी प्लॅंटवर कठोर कारवाई करण्यात येत आहे. ही कारवाई भविष्यातही सुरू राहील.’

- मंचक जाधव, उप प्रादेशिक अधिकारी, महाराष्ट्र प्रदूषण नियंत्रण मंडळ