अनुसूचित जाती जमाती आयोगाचा उद्यापासून पुणे जिल्ह्याचा दौरा

पिंपरी, ता. ४ ः महाराष्ट्र राज्य अनुसूचित जाती जमाती आयोगाचा पुणे, पिंपरी-चिंचवडसह जिल्ह्याचा दौरा बुधवारपासून (ता. ६) शुक्रवारपर्यंत (ता. ८) आहे.
आयोगाचे अध्यक्ष आनंदराव अडसूळ (मंत्री दर्जा) आणि सदस्य गोरक्ष लोखंडे (सचिव दर्जा) यात विविध प्रलंबित विषयांचा आढावा घेतील, असे आयोगाचे सदस्य सचिव संयत कमलाकर यांनी सांगितले. बुधवारी सकाळी ११ ते दुपारी दोन या वेळेत पिंपरी-चिंचवड महापालिका आयुक्तांसमवेत मागासवर्गीय अधिकारी, कर्मचाऱ्यांच्या प्रश्‍नांचा आढावा घेतला जाईल. त्यानंतर रमाई घरकुल वस्ती योजनेचा आढावा व कामाची पाहणी होईल. झोपडपट्टी पुनर्वसन प्राधिकरणाचे (एसआरए) अधिकारी व विकसकांसमवेत झोपडपट्टी पुनर्वसन प्रकल्पातील पात्र-अपात्र नागरिकांशी अडचणींबाबत संवाद साधण्यात येईल. दुपारी दोन ते तीन ही वेळ राखीव आहे. दुपारी चार वाजता पुणे महापालिका आयुक्तांसमवेत मागासवर्गीय अधिकारी-कर्मचाऱ्यांचे प्रश्‍न, दलित वस्ती रमाई घरकूल वस्ती योजना आणि पुण्यातील एसआरए प्रकल्पांचा आढावा घेण्यात येईल.
गुरुवारी सकाळी ११ ते दुपारी दोन या वेळेत पुण्यातील शासकीय विश्रामगृहात बारामती, खेड, देहू, दौंड, चाकण, तळेगाव दाभाडे, सासवड, इंदापूर, भोर, आंबेगाव, मंचर, जेजुरी नगरपरिषदा व नगरपंचायतींच्या मुख्याधिकाऱ्यांसमवेत बैठक होईल. त्यात रमाई घरकुल योजनांचा आढावा घेतला जाईल.
शुक्रवारी सकाळी ११ ते दुपारी १२ या वेळेत समाज कल्याण विभागाच्या सहाय्यक आयुक्तांसमवेत सामाजिक न्याय विभागाशी संबंधित विषयांचा आढावा घेतला जाईल. दुपारी १२ ते सायंकाळी सहा यावेळेत सर्व नगरपालिकांच्या कामांची तपासणी, महापालिकांना प्राप्त महसुलाच्या पाच टक्के निधी आर्थिक दुर्बल घटकांवर खर्च करण्याबाबत तपासणी होईल.
----