स्वस्त धान्य दुकानदारांना कमिशनची प्रतिक्षा गेल्या पाच महिन्‍यांपासून कमिशन रखडल्याने संघटना संतप्त
पिंपरी, ता. ४ : पिंपरी-चिंचवड शहरातील स्वस्त धान्य दुकानदार गेली पाच महिने कमिशनपासून वंचित आहेत. कमिशन न दिल्‍याने खर्च कसा भागवायचा, असा प्रश्‍न दुकानदार उपस्‍थित करत आहेत. संघटनेच्‍या वतीने सातत्‍याने शासनदरबारी पत्रव्‍यवहार केला जात आहे. मात्र सकारात्‍मक निर्णय घेतला जात नाही. शासनाच्‍या या कारभारामुळे दुकानदार संघटना संतप्त झाली आहे. तर फेब्रुवारीपर्यंतचे दुकानदारांचे कमिशन दिलेले असल्‍याचे संबंधित विभागाचे म्‍हणणे आहे. काहींच्‍या कागदोपत्री अडचणी असल्‍याने कमिशन दिले नसल्‍याचे अधिकाऱ्यांनी सांगितले.
पिंपरी-चिंचवड शहरातील २८४ स्वस्त धान्य दुकानदारांमार्फत धान्य वाटप केले जाते. सार्वजनिक अन्नधान्य वितरण व्यवस्थेत नागरिकांना राष्ट्रीय अन्नसुरक्षा योजनेतून धान्यपुरवठा केला जात आहे. या योजनेतून स्वस्त धान्य दुकानदारांना दीडशे रुपये प्रतिक्विंटल कमिशन प्राप्‍त होते. सुरवातीला दर तीन महिने कमिशन दिले जात होते. काही काळानंतर यात खंड पडला. त्यामुळे कमिशनसाठी रेशन दुकानदारांना चार ते पाच महिने वाट पाहावी लागत आहे. आता प्रतीक्षा कालावधी सहा ते आठ महिन्यांवर पोहोचला आहे.
पिंपरी-चिंचवड शहरातील दुकानदारांचे डिसेंबरपासूनचे कमिशन मिळाले नाही. धान्य वाटपाचे शंभर टक्के लक्ष पूर्ण करण्याचे उद्दिष्ट धान्य दुकानदारांना देण्यात येते. मात्र, याच दुकानदारांचे कमिशन रखडले आहे. कमिशन न मिळाल्‍यास खर्च कसा भागवायचा. वीजबिल व इतर खर्चाची चिंता दुकानदारांना आहे. शासनाने सकारात्‍मक लक्ष देण्याची मागणी होत आहे.
‘‘कमिशन रखडल्याने स्वस्त धान्य दुकानदार आर्थिक अडचणीत आहेत. त्यांना उत्पन्नाचे दुसरे साधन नसल्याने उपजीविका चालविणे अवघड होत आहे. राज्य सरकारसोबत झालेल्या बैठकीतील निर्णयावर कार्यवाही केली जात नसल्याचा फटका रेशनिंग दुकानदारांना बसत आहे. दुकानदारांच्या सहनशीलतेचा अंत जिल्हाधिकारी कार्यालयाने पाहू नये, अशी माफक अपेक्षा आहे.
- विजय गुप्‍ता, खजिनदार, ऑल महाराष्ट्र फेरप्राईप शॉपकिपर्स असोसिएशन.
‘‘स्वस्त धान्य दुकानदारांना फेब्रुवारीपर्यंतचे कमिशन दिले आहे. काहींच्‍या कागदपत्रांची पूर्तता झालेली नाही. त्यांना परिमंडळ कार्यालयाकडून नोटीस बजावण्यात आली आहे. कागदपत्रे दिल्‍यानंतर कमिशन दिले जाईल.
- प्रशांत खताळ, अन्नधान्य वितरण व पुरवठा अधिकारी.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.