अतिरिक्त जिल्हा व सत्र न्यायालयाचे रविवारी लोकार्पण

पिंपरी, ता. २३ ः शहराला आता स्वतःचे ‘अतिरिक्त जिल्हा व सत्र न्यायालय’ लाभणार आहे. या न्यायालयाचा भव्य लोकार्पण सोहळा रविवारी (ता. २५) सकाळी १०.३० वाजता, मोरवाडी येथील जुनी न्यायालयीन इमारत येथे मुंबई उच्च न्यायालयाचे न्यायाधीश संदीप मारणे व आरिफ डॉक्टर यांच्या हस्ते तर पुणे जिल्ह्याचे प्रमुख न्यायाधीश एम. के. महाजन यांच्या प्रमुख उपस्थितीत संपन्न होणार आहे.
पिंपरी चिंचवड शहर हे वेगाने विकसित होणाऱ्या औद्योगिक शहरांपैकी एक असून, येथे मोठ्या प्रमाणात औद्योगिक, फौजदारी, दिवाणी तसेच श्रमविषयक प्रकरणांची संख्या सातत्याने वाढत आहे. यामुळे न्यायालयीन कामकाजाचा ताण वाढत होता. पिंपरी चिंचवड शहरात स्वतंत्र अतिरिक्त जिल्हा व सत्र न्यायालय स्थापन करण्याची मागणी गेली अनेक वर्षे होत होती. अखेर शहराला आता स्वतःचे ‘अतिरिक्त जिल्हा व सत्र न्यायालय’ लाभणार आहे. या न्यायालयाच्या स्थापनेमुळे नागरिकांना न्यायासाठी पुणे न्यायालयात वारंवार जावे लागणार नाही, वेळेची आणि आर्थिक बचत होणार असून, न्यायप्रणालीवरील नागरिकांचा विश्वास अधिक दृढ होईल. तसेच वकील, न्यायालयीन कर्मचारी व संबंधित यंत्रणांसाठीही कामकाज अधिक सुसूत्रपणे पार पडण्याचा मार्ग मोकळा होणार आहे. तसेच शहराच्या सर्वांगीण विकासाच्या आणि सक्षम न्यायव्यवस्थेच्या दिशेने एक अत्यंत महत्त्वपूर्ण पाऊल ठरणार आहे.

‘‘पिंपरी चिंचवड शहराच्या न्यायालयीन हक्कासाठीचा हा ऐतिहासिक क्षण अनुभवण्यासाठी व लोकशाहीच्या या महत्त्वपूर्ण घटनेचे साक्षीदार होण्यासाठी नागरिक व वकिलांनी मोठ्या संख्येने उपस्थित राहावे.
- अ‍ॅड. उमेश खंदारे, सचिव, पिंपरी चिंचवड अ‍ॅडव्होकेट्स बार असोसिएशन
---