नववर्षानंतर परतीच्या प्रवासामुळे पुणे-मुंबई महामार्गावर कोंडी

सोमाटणे, ता. १ ः नववर्ष साजरे करून परतीच्या प्रवासाला निघालेल्या पर्यटकांमुळे पुणे-मुंबई महामार्ग आणि द्रुतगती मार्गावर वाहतूक संथ झाली. सलग सुट्यांचा लाभ घेत सरत्या वर्षाला निरोप देण्यासाठी आणि नवीन वर्षाचे स्वागत करण्यासाठी तीन दिवसांपूर्वी मोठ्या संख्येने पर्यटक कोकणातील विविध पर्यटनस्थळी दाखल झाले होते.
कोकणात जाताना जलद प्रवासासाठी अनेक पर्यटकांनी मुंबई-गोवा महामार्गाऐवजी पुणे-मुंबई महामार्ग व द्रुतगती मार्गाला पसंती दिली होती. गेल्या तीन दिवसांत पर्यटनाचा आणि नववर्ष साजरे करण्याचा आनंद घेतल्यानंतर आज बहुसंख्य पर्यटक परतीच्या प्रवासाला निघाले. कोकणात जाताना पर्यटक वेगवेगळ्या वेळांना रवाना झाले होते. मात्र, परतीचा प्रवास बहुतांश जणांनी एकाच वेळेत केल्याने मुंबईकडे जाणाऱ्या लेनवर वाहनांची संख्या अचानक मोठ्या प्रमाणात वाढली. परिणामी पुणे-मुंबई महामार्ग व द्रुतगती मार्गावर दुपारी सुमारे दोन तास वाहतूक कोंडी निर्माण झाली. या कोंडीत शौर्य दिनानिमित्त भीमा कोरेगाव येथे गेलेल्या अनुयायांच्या वाहनेही मोठ्या प्रमाणात होती.

१४४३