दिव्यांग भवनात पथनाट्याद्वारे मतदान जागृती

पिंपरी, ता. २ : महापालिकेच्या दिव्यांग भवन फाउंडेशन येथे पथनाट्य सादरीकरण, ‘फ्लॅश मॉब’ आणि स्वाक्षरी मोहीम राबवत दिव्यांग बांधवांसाठी मतदान जागृती उपक्रम घेण्यात आला. या कार्यक्रमात दिव्यांगांसाठी सांकेतिक भाषेत मतदान शपथ घेण्यात आली.
महापालिका निवडणुकीत मतदानाची टक्केवारी वाढावी यासाठी ‘स्वीप’ कार्यक्रमांतर्गत हा उपक्रम राबविण्यात आला. अतिरिक्त आयुक्त तृप्ती सांडभोर, फाउंडेशनचे व्यवस्थापकीय संचालक ओमप्रकाश देशमुख यांच्यासह महापालिकेचे उपायुक्त अण्णा बोदडे, ममता शिंदे दिव्यांग बांधव उपस्थित होते.
दिव्यांग मतदारांना महापालिकेकडून मतदान केंद्रावर आवश्यक त्या सोयीसुविधा समाज विकास विभागाच्या माध्यमातून उपलब्ध करून देण्यात आल्या आहेत, असे सांडभोर यांनी सांगितले. दिव्यांग बांधवांनी निवडणुकीत मतदानाचा हक्क बजावत मतदानाच्या माध्यमातून ‘पर्पल’ जल्लोष साजरा करावा, अशी अपेक्षा बोदडे यांनी व्यक्त केली. देशमुख यांनी प्रत्येक दिव्यांग बांधवांनी मतदान करण्यासाठी पुढे यावे, असे आवाहन केले. प्रास्ताविक दिव्यांग भवनचे मुख्य कार्यकारी अधिकारी परेश गांधी यांनी केले.