‘महाराष्ट्र बॅंक ऑफिसर्स’चे आज आळंदीत अधिवेशन

पिंपरी, ता. ९ : ‘बँक ऑफ महाराष्ट्र ऑफिसर्स ऑर्गनायझेशन’चे २१ वे त्रैवार्षिक राष्ट्रीय अधिवेशन शनिवारी (ता. १०) होत आहे. आळंदी देवाची (ता. खेड) येथील फ्रुटवाले धर्मशाळेच्या सभागृहात आयोजित अधिवेशनाचे उद्‍घाटन खासदार मेघा कुलकर्णी यांच्या हस्ते सायंकाळी पाच वाजता होईल.

भारतीय मजदूर संघ व नॅशनल ऑर्गनायझेशन ऑफ बँक ऑफिसर्सशी संलग्न ही संघटना आहे. या अधिवेशनात बँक ऑफ महाराष्ट्रचे व्यवस्थापकीय संचालक व मुख्य कार्यकारी अधिकारी निधू सक्सेना, भारतीय मजदूर संघाचे राष्ट्रीय सरचिटणीस रवींद्र हिंमते, भारतीय मजदुर संघाचे राष्ट्रीय चिटणीस व वित्तीय संस्था प्रभारी गिरीश चंद्र आर्य, बोमोचे संस्थापक बाळासाहेब फडणवीस, नॅशनल ऑर्गनायझेशन ऑफ बँक ऑफिसर्सचे राष्ट्रीय सरचिटणीस के. एन. आदर्श उपस्थित राहतील. सध्याची बँकिंग उद्योगासमोरील आव्हाने, बँक ऑफ महाराष्ट्रमधील अधिकाऱ्यांचे ज्वलंत प्रश्न, राष्ट्रीयकृत बँकांचे होऊ घातलेले विलीनीकरण आदी विषयांवर चर्चा होऊन विविध ठराव मंजूर केले जातील. देशभरातील शाखांचे प्रतिनिधी उपस्थित राहणार आहेत, अशी माहिती ऑर्गनायझेशनचे राष्ट्रीय सरचिटणीस संतोष गदादे यांनी दिली.