पोलिसांनी पाठलाग करून वाहने चोरणाऱ्यांना पकडले

पिंपरी, ता. ९ : महागडी वाहने चोरणाऱ्या तीन जणांना बावधन पोलिसांनी पाठलाग करून पकडले. त्यांच्याकडून वाहनेचोरीचे पाच गुन्हे उघडकीस आले. पोलिसांनी त्यांच्याकडून पाचही वाहने जप्त केली.
धनाजी नागनाथ लोकरे (रा. लऊळ चौशी वस्ती, ता. माढा, जि. सोलापुर), दत्तात्रय ऊर्फ सतीश सदाशिव जाधव (रा. उरळी देवाची, धनगर वस्ती, ता. हवेली, पुणे, मुळ- पेनुरगाव, ता. मोहोळ, जि. सोलापुर), अमित नागनाथ गवळी (रा. पेनुरगाव, ता. मोहोळ, जि. सोलापुर) अशी आरोपींची नावे आहेत.
बावधनमधील नागेश वामन शिंदे यांनी वाहन चोरीला गेल्याबाबतची तक्रार दिली होती. या गुन्ह्याच्या तपास अंतर्गत पोलिस ८० ते ९० सीसीटिव्ही कॅमेऱ्यांचे फुटेज तपासले. भूगाव रस्ता येथे तीन संशयित व्यक्ती चोरीची गाडी घेऊन येत असल्याची माहिती पोलिसांना मिळाली. त्यानुसार पोलिसांनी सापळा रचला. ही गाडी अडविण्याचा प्रयत्न पोलिसांनी केला, पण आरोपींनी गाडी भरधाव नेली. पोलिसांनी सुमारे २५ ते ३० किलोमीटर पाठलाग करून अखेर गाडी पकडून तिन्ही आरोपींना ताब्यात घेतले. चौकशीत आरोपींनी महाळुंगे पोलिस ठाण्याच्या हद्दीतून गाडी चोरल्याची कबुली दिली. अधिक चौकशीत बावधन पोलिस ठाण्याच्या हद्दीतून एक टेम्पो, एक मोटार तसेच चाकण आणि सासवड येथून प्रत्येकी एक छोटा टेम्पो चोरल्याची कबुली त्यांनी दिली.
--------------------------------