भोसरी परिसरातील वाहतूक मार्गात आज बदल

पिंपरी, ता. १० : भोसरी येथे महापालिका निवडणुकीनिमित्त रविवारी (ता. ११) सायंकाळी प्रचार फेरीचे आयोजन केले असल्याने भोसरी परिसरातील वाहतूक मार्गात दुपारी तीन ते रात्री नऊ या कालावधीसाठी बदल करण्यात आला आहे.

असा असेल बदल
- दिघी-भोसरी रस्त्याने ममता स्वीट चौकातून भोसरीकडे जाण्यास तसेच आळंदी-भोसरी रस्त्यावरील मॅगझीन चौकातून भोसरीकडे जाणाऱ्या वाहनांना प्रवेश बंद राहणार असून, या दोन्ही मार्गांवरील वाहने अलंकापुरम रस्ता- जय गणेश साम्राज्य चौक मार्गे जातील.
- पुणे ते नाशिक महामार्गावरील भोसरी उड्डाणपुलाजवळील जायका चहा येथून भोसरी उड्डाणपुलाखाली जाण्यास वाहनांना प्रवेश बंद राहणार असून, ही वाहने उड्डाणपुलावरून जय गणेश साम्राज्य चौक मार्गे इच्छितस्थळी जातील.
- नाशिक ते पुणे महामार्गावरील भोसरी उड्डाणपुलाजवळील बालाजी ट्रेडर्स येथून भोसरी उड्डाणपुलाखाली जाण्यास वाहनांना प्रवेश बंद राहणार असून, ही वाहने उड्डाणपुलावरून गुडविल चौकातून तसेच सद्‍गुरुनगर चौक ते बनाचा ओढा चौकातून इच्छितस्थळी जातील.
- लांडेवाडीतील छत्रपती शिवाजी महाराज पुतळा चौकातून भोसरी उड्डाणपुलाखाली जाण्यास वाहनांना प्रवेश बंद राहणार असून, ही वाहने टेल्को रस्त्याने जातील.
- सद्‍गुरुनगर ते दिघी मॅगझीन चौक या रस्त्यावर मॅगझीन चौकाकडे जाण्यास एकेरी मार्ग असेल. तर मॅगझीन चौक ते सद्‍गुरुनगरकडे जाण्यास वाहनांना मनाई असेल. या मार्गावरील वाहने आळंदी रस्त्याने मॅगझीन चौक मार्गे जातील.
---