सुखी जीवनासाठी आनंद वाटत चला ः राजन लाखे

पिंपरी, ता. ११ ः ‘घे आनंद तू आनंदाचा काळजीत आनंद सरतो रे.....!’ या उक्तीप्रमाणे सुखी जीवनासाठी आनंद वाटत चला. सकारात्मक विचार करा, एकमेकांशी संवाद साधत चला. मग जगण्यातील मजा वेगळीच आहे, असे उद्गार महाराष्ट्र साहित्य परिषदेच्या पिंपरी चिंचवड शाखेचे अध्यक्ष राजन लाखे यांनी काढले.
शरद नगर येथील स्वामी विवेकानंद लोकसेवा प्रतिष्ठानच्या वतीने आयोजित स्वामी विवेकानंद व्याख्यानमालेच्या उद्‍घाटनप्रसंगी ते बोलत होते. ‘जगण्यात मजा आहे’ या विषयावर लाखे यांनी प्रथम पुष्प गुंफले. यावेळी देवराम मेदनकर, पांडुरंग गमे पाटील, शरद पाचणकर, रामराजे बेंबडे आदी उपस्थित होते. बालकलाकार ईश्वर राम साठे याने केलेल्या क्लारनेट वादनाने कार्यक्रमाची सुरवात झाली.
लाखे म्हणाले की, ‘‘मातेपासून सुरु झालेला माती पर्यंत जगण्याचा प्रवास म्हणजेच आयुष्य. आनंद मनाला होतो शरीराला नाही. जीव जन्माला आल्यावर संस्कार, वृत्ती, प्रवृत्ती, प्रकृती, स्वभाव, प्रगती, तारुण्य, प्रौढत्व, वंध्यत्व, निवृत्ती, सद्गती अशा टप्प्यातून जावे लागते. जीवन सुंदरच आहे.’’
अविनाश आवटे यांनी सूत्रसंचालन केले. संतोष ठाकूर यांनी प्रास्ताविक केले. मिलिंद वेल्लाळ यांनी आभार मानले. सुनील पंडित, हंबीर राव भिसे, बापू साळुंके, शंकर बनकर, अशोक हाडके यांनी संयोजन केले.
-----