अष्टविनायक दर्शनासाठी एसटीच्या आठ बस रवाना

पिंपरी, ता. ५ ः अष्टविनायक दर्शनासाठी महाराष्ट्र राज्य मार्ग परिवहन महामंडळाच्या (एसटी) बसला भाविकांची पसंती मिळाली आहे. अंगारकी संकष्ट चतुर्थीनिमित्त सोमवारी (ता. ५) पुणे विभागातील शिवाजीनगर आणि चिंचवड आगारातून एसटीच्या आठ विशेष बस सोडण्यात आल्या आहेत, अशी माहिती विभाग नियंत्रक अरुण सिया यांनी दिली.
अंगारकी संकष्ट चतुर्थी मंगळवारी (ता. ५) आहे. त्यानिमित्त पुणे विभागातून अष्टविनायकाच्या दर्शनासाठी एसटीच्या विशेष बस सोडण्याचा निर्णय घेतला होता. त्यासाठी आगाऊ बुकिंग सुरू केले होते. अष्टविनायक दर्शनासाठी दर महिन्याला संकष्टी चतुर्थीनिमित्त पुणे विभागातून एसटी बस रवाना होतात. या पूर्वी चिंचवड आणि शिवाजीनगर स्थानकातून बस रवाना होत होत्या. पण, नवीन वर्षातील पहिली अंगारकी चतुर्थी असल्याने आणि माफक दर असल्याने भाविकांनी एसटीला पसंती दर्शवली आहे. शिवाजीनगर आगारातील पाच आणि चिंचवड स्थानकातून तीन बसचे बुकिंग झाले होते. या सर्व बस सोमवारी सकाळी सहा वाजता अष्टविनायक दर्शनासाठी रवाना झाल्या आहेत. भाविकांसाठी ओझर येथील भक्त निवासात राहण्याची आणि जेवणाची सोय केली आहे. पण, तो खर्च भाविकांना करावा लागणार आहे. या बस थेऊर, मोरगाव, सिद्धटेक, रांजणगाव, ओझर, लेण्याद्री, महाड, पालीच्या दर्शनानंतर पुन्हा बस शिवाजीनगर आणि चिंचवड आगारात दाखल होणार आहे.