मोशीमध्ये कंटेनरची पाच मोटारींना धडक; एक जखमी

पिंपरी, ता. २१ : भरधाव कंटेनरने रस्त्यालगत उभ्या असलेल्या पाच मोटारींना धडक दिली. यामध्ये एकजण किरकोळ जखमी झाला. मोशीमध्ये शुक्रवारी (ता. २०) रात्री अकराच्या सुमारास हा प्रकार घडला. कंटेनर मोशी उपबाजार समिती रस्ता ते चिखली रस्ता या मार्गाने जात होता. चालकाचे नियंत्रण सुटल्याने कंटेनर धडकला. चार मोटारींत कोणीही नव्हते. एका मोटारीत चालक होता. तो किरकोळ जखमी झाला. स्थानिक नागरिकांनी कंटेनर चालकाला पकडून पोलिसांच्या ताब्यात दिले. एमआयडीसी भोसरी पोलिसांनी त्याच्यावर गुन्हा दाखल केला आहे.
-----