स्थायी समिती सभापतीपदी अभिषेक बारणे बिनविरोध

पिंपरी, ता. २८ ः महापालिका स्थायी समिती अध्यक्षपदी भारतीय जनता पक्षाचे अभिषेक बारणे यांची बिनविरोध निवड झाली. त्यानंतर त्यांनी पदाची सूत्रे स्विकारली.
स्थायी समिती अध्यक्ष निवडीसाठी दिवंगत महापौर मधुकरराव पवळे सभागृहात समितीची विशेष सभा झाली. पीठासीन अधिकारी एम. जे. प्रदीप चंद्रन होते. त्यांनी अध्यक्षपदासाठी प्राप्त अर्जांची छाननी केली. त्यात बारणे यांचा एकमेव अर्ज होता. तो वैध ठरला. त्यामुळे त्यांची बिनविरोध निवड झाल्याचे प्रदीप चंद्रन यांनी जाहीर केले. आयुक्त श्रावण हर्डीकर, अतिरिक्त आयुक्त तृप्ती सांडभोर, विक्रांत बगाडे, नगरसचिव मुकेश कोळप, मुख्य लेखा व वित्त अधिकारी प्रवीणकुमार जैन, मुख्य लेखापरीक्षक प्रमोद भोसले, विशेष अधिकारी किरण गायकवाड आदी उपस्थित होते. जनता संपर्क अधिकारी प्रफुल्ल पुराणिक यांनी सूत्रसंचालन केले. महापौर रवी लांडगे, पक्षनेते प्रशांत शितोळे, विरोधी पक्षनेते भाऊसाहेब भोईर, उपमहापौर शर्मिला बाबर यांच्यासह नगरसदस्यांनी बारणे यांचे अभिनंदन केले.
---