शहरासह मावळात रिमझीम पाऊस

सकाळ वृत्तसेवा
पिंपरी, ता. ४ ः पिंपरी चिंचवड शहरात रविवारी (ता. ४) सायंकाळी सहाच्या सुमारास रिमझिम पाऊस झाला. अचानक आलेल्या पावसामुळे वाहनचालक आणि पादचाऱ्यांची तारांबळ उडाली. पावसामुळे वातावरणातील गारवा वाढला. त्यामुळे धुळीमुळे त्रस्त झालेल्या नागरिकांना थोडा वेळ तरी दिलासा मिळाला.
शहरात डिसेंबर महिन्यात उत्तरेकडून येणाऱ्या थंड हवेमुळे गारठा वाढला होता. किमान तापमान १४ अंश सेल्सिअसपर्यंत घसरले होते. दशकातील सर्वात कमी तापमानाची नोंद यंदा झाली होती. गारठा वाढल्याने शहरातील चौकाचौकात शेकोट्या पेटलेल्या दिसत होत्या. उबदार कपड्यांचाही वापर वाढला होता. गेल्या मागच्या काही दिवसांपासून मात्र ढगाळ वातावरणामुळे किमान आणि कमाल तापमानात वाढ झाली होती. रविवारी दुपारपासूनच शहरातील विविध भागांत ढगाळ वातावरण होते. सायंकाळी सहाच्या सुमारास रावेत, पुनावळे, देहूरोड आणि परिसरात रिमझीम पावसाला सुरवात झाली. सुमारे २० ते २५ मिनिटे पाऊस झाला.
----