होळी जोड

पिंपळे गुरव परिसरात नकारात्मक मूल्यांची होळी

पिंपळे गुरव येथील शाळा क्रमांक ५४ मध्ये महापौर रवि लांडगे यांच्या संकल्पनेतून पर्यावरणपूरक होळी साजरी करण्यात आली. प्रतीकात्मक स्वरुपात ‘फसवणूक, खोटं बोलणे, मोह, भांडणे, स्वार्थ, चोरी, अहंकार, चिडचिड आणि भ्रष्टाचार’ या नकारात्मक प्रवृत्तींची होळी पेटविण्यात आली. समाजात प्रामाणिकपणा, बंधुभाव, पर्यावरणप्रेम आणि सामाजिक जबाबदारी यांसारखी मूल्ये रुजविण्याचा संदेश या उपक्रमातून देण्यात आला. विद्यार्थ्यांनी ‘होळी लहान करा, पोळी दान करा’, ‘पर्यावरण रक्षक हेच मूल्यशिक्षण’, ‘नैसर्गिक रंग वापरा, पाणी वाचवा’ अशा घोषणा यावेळी देण्यात आल्या. इयत्ता तिसरीच्या विद्यार्थिनींनी कविता सादर करून उपस्थितांची मने जिंकली. तसेच राधिका अग्रे हिने महापौरांच्या उपस्थितीत सर्व विद्यार्थ्यांच्या वतीने प्रतिज्ञा घेत ‘प्रत्येक वर्षी होळी नैसर्गिक रंगांच्या माध्यमातूनच साजरी करू,’ असा संकल्प केला.
या प्रसंगी शिक्षण विभागाच्या सभापती रविना आंघोळकर, नगरसदस्य ज्ञानेश्वर जगताप, शशिकांत कदम, पर्यवेक्षक ज्योती तापकीर, श्रीकांत चौगुले, शाळेच्या मुख्याध्यापिका गीतांजली पोळ, पांडुरंग मुद्गुन आदी उपस्थित होते.