पिंपरी चिंचवड शहरात मध्यम पाऊस

पिंपरी, ता. २३ : शहर परिसरात मंगळवारी सायंकाळच्या सुमारास हलका ते मध्यम स्वरुपाचा पाऊस झाला. त्यामुळे उकाड्यापासून दिलासा मिळाला आहे. तर, नागरिकांना अजूनही मोठ्या पावसाची प्रतीक्षा आहे.
या पावसाने अनेक मुख्य रस्त्यांवर पाणी साचले. त्यामुळे वाहतूक संथगतीने सुरू होती. प्रमुख रस्त्यांवर वाहनांच्या लागल्या. चौकांमध्ये कोंडी निर्माण झाली होती. दरम्यान, दुपारनंतर वातावरणात अचानक बदल होऊ लागला. ढगांनी शहर व्यापले आणि काही क्षणांतच रिमझिम पावसाला सुरुवात झाली. सायंकाळनंतर पिंपरी, निगडी, वाकड, काळेवाडी या भागात अर्धा ते पाऊण तास मध्यम स्वरुपाचा पाऊस पडला. तर भोसरी, दिघी, मोशी, चऱ्होली, डुडूळगाव परिसरातही रिमझिम पाऊस झाला. तळवडे, काळेवाडी, पुणे मुंबई महामार्गावरील सेवा रस्ता आणि निगडी परिसरामध्ये काही काळ वाहतूक धिम्या गतीने सुरू होती. तापकीर चौक ते छत्रपती शिवाजी महाराज चौकापर्यंत, तसेच काळेवाडी फाटा आणि रहाटणी फाटा परिसरातही वाहतूक कोंडी झाली होती. निगडीतील उड्डाणपुलाखाली पाणी साचल्यामुळे रस्ता ओलांडताना तारेवरची कसरत करावी लागली.