‘जगण्याला अर्थ देण्याचे वारकरी संप्रदायात सामर्थ्य’

निगडी, ता.२५ ः ‘‘समाजात अनेक जण रडतकढत जगत आहेत. पण, वारकरी संप्रदायामध्ये हा आनंद वेगळा आहे. जगण्याला अर्थ देण्याचे सामर्थ्य संप्रदायात आहे,’’ असे प्रतिपादन कीर्तनकार शंकर महाराज शेवाळे यांनी केले.
यमुनानगर येथील श्री विठ्ठल रुक्मिणी मंदिराच्या तृतीय वर्धापन दिन सोहळा, कलशारोहण समारंभ, गणेश मूर्तीची प्राणप्रतिष्ठापना सोहळ्यानिमित्त आयोजित श्री ग्रंथराज ज्ञानेश्वरी पारायण सोहळ्यात काल्याच्या कीर्तनामध्ये शेवाळे महाराज बोलत होते. यावेळी महापौर रवी लांडगे, भाऊसाहेब भोईर, अभिषेक बारणे, मंदिराच्या संस्थापिका नगरसेविका सुलभा उबाळे, राम उबाळे, मंदिर विश्वस्त अंकुश जगदाळे, शशीकिरण गवळी, कार्याध्यक्ष तुकाराम वारंग यासह मोठ्या संख्येने भाविक उपस्थित होते.
शेवाळे महाराज म्हणाले, ‘‘चांगल्या कामाचे फळ कोणत्या ना कोणत्या मार्गाने मिळतच राहते. आपली सत्ता सर्वत्र असावी, असे प्रत्येकाला वाटते. मात्र, सर्वांची सत्ता चालत नाही. एकाची सत्ता चालते.’’
यावेळी समारंभासाठी मदत करणाऱ्या मान्यवरांचा विश्वस्तांच्या वतीने सत्कार करण्यात आला. तत्पूर्वी, परिसरातून कलशाची मिरवणूक काढण्यात आली.