पावसाळी पाणी निचऱ्यासाठी त्रिस्तरीय उपाययोजना करा

पिंपरी, ता. २ ः रस्त्यांवरील खोदकामे, अपूर्ण कामे, खड्डे, अपुऱ्या निचऱ्यामुळे पावसाचे पाणी साचल्याने अनेक ठिकाणी वाहतूक विस्कळीत झाली. नागरिक, वाहनचालक व पादचाऱ्यांना गैरसोयींना सामोरे जावे लागले. या पार्श्वभूमीवर महापौर रवी लांडगे यांनी प्रशासनाला तत्काळ, मध्यमकालीन आणि दीर्घकालीन अशा तीन स्तरांवर नियोजनबद्ध उपाययोजना करण्याचा आदेश दिला.
महापौर रवी लांडगे म्हणाले, ‘‘सर्व प्रमुख व अंतर्गत रस्त्यांवरील खड्डे बुजवून दुरुस्ती केली जाईल. सर्व खोदकामे बंदिस्त करून रस्ते पूर्वस्थितीत आणले जातील. साचलेले पाणी तातडीने काढण्यासाठी पंपिंग यंत्रणा कार्यान्वित केली जाईल. प्रमुख चौक, पूल, भुयारी मार्ग व सखल भागांत विशेष पथके नियुक्त करून सतत देखरेख राहील. नागरिकांच्या तक्रारी सोडविण्यासाठी २४ बाय सात नियंत्रण कक्ष सक्षम केला जाईल. हलगर्जीपणा केल्यास कंत्राटदार व अधिकाऱ्यांवर कठोर कारवाई केली जाईल.’’

मध्यमकालीन उपाययोजना
- पावसाळ्यापूर्वी नालेसफाई, गटार स्वच्छतेची कामे
- वारंवार पाणी साचणाऱ्या ठिकाणी स्वतंत्र निचरा आराखडा
- विविध विभागांत समन्वयासाठी विशेष समन्वय समिती
- रोड कटिंग परवानग्यांवर कडक अंमलबजावणी
- रस्त्यांच्या गुणवत्तेसाठी तृतीय पक्ष तपासणी यंत्रणा

दीर्घकालीन उपाययोजना
- एकात्मिक पर्जन्यजल व्यवस्थापन आराखडा करून टप्प्याटप्प्याने अंमलबजावणी
- स्मार्ट तंत्रज्ञानाच्या सहाय्याने पूरस्थितीचे रिअल-टाइम मॉनिटरिंग
- अंडरग्राउंड युटिलिटी डक्ट प्रणाली विकसित करून खोदकामे टाळले जातील
- सखल भागांमध्ये कायमस्वरुपी पंपिंग स्टेशन उभारणार
- जनजागृतीद्वारे नाल्यांत कचरा टाकण्याचे प्रमाण कमी करण्यावर भर