रावेत, किवळेमध्ये बत्तीगुल

रावेत, ता. १६ : मुंबई - बंगळुरू महामार्गालगत रावेत येथील रूणाल स्पेसेसजवळ भारतीय राष्ट्रीय राजमार्ग प्राधिकरण (एनएचएआय) च्या सुरू असलेल्या कामादरम्यान दोन उच्चदाबाच्या केबल तुटल्याने किवळे, मामुर्डी, साईनगर, थॉमस कॉलनी, विकासनगर तसेच रावेतच्या काही भागांतील सुमारे ३५ हजार वीजग्राहक अंधारात राहिले.
दुपारी सुमारे चार वाजण्याच्या सुमारास हा प्रकार घडला. खोदकामात महावितरणच्या केबलचे मोठे नुकसान झाले.
महावितरणचे अतिरिक्त कार्यकारी अभियंता किरण सरवदे म्हणाले,‘‘कुठली ही पूर्वसूचना न देता एनएचएआयतर्फे रस्ता खोदण्याचे काम सुरू आहे. केबल तुटल्याचे कारण एनएचएआयच्या कामाशी संबंधित असल्याचे दिसत आहे. आमचे कर्मचारी घटनास्थळी काम करत असून रात्री उशिरापर्यंत पुरवठा सुरळीत करण्याचे प्रयत्न सुरू आहेत.’’