रावेत परिसरातील अनेक पथदिवे बंद

रावेत, ता. ९ : रावेत परिसरातील म्हस्के वस्ती ते मुकाई चौक या अत्यंत वर्दळीच्या मार्गावरील अनेक पथदिवे गेल्या काही दिवसांपासून बंद आहेत. त्यामुळे रात्रीच्या वेळी हा परिसर अंधारात बुडालेला असतो. परिणामी वाहनचालक, पादचारी, महिला, ज्येष्ठ नागरिक तसेच विद्यार्थ्यांची मोठी गैरसोय होत आहे. त्यांच्यात असुरक्षिततेची भावना वाढली आहे.
हा मार्ग रावेत, किवळे, आकुर्डी व मुंबई-पुणे महामार्गाकडे जाण्यासाठी महत्त्वाचा आहे. तेथे दिवसभर मोठ्या प्रमाणात वाहतूक असते. रात्री पथदिवे बंद असल्याने खड्डे, गतिरोधक, वाहिन्यांवरील उघडी झाकणे आणि बांधकामामुळे पडलेला राडारोडा दिसत नाही. त्यामुळे दुचाकी व चारचाकी वाहनांच्या अपघाताचा धोका वाढला आहे.
स्थानिक रहिवासी शरद आव्हाळे यांनी सांगितले की, ‘दररोज रात्री कामावरून परतताना भीती वाटते. रस्ता दिसत नाही. खड्डा कुठे आहे हे कळत नाही. लहान मुले आणि महिला या मार्गावरून जाणे टाळत आहेत.’
पादचाऱ्यांसाठीही ही परिस्थिती धोकादायक ठरत आहे. सोसायटीतून बाहेर पडून मुकाई चौकात जाणाऱ्या नागरिकांना त्रास होत आहे. नागरिकांनी या संदर्भात महापालिकेकडे आणि विद्युत विभागाकडे पथदिवे त्वरित सुरू करण्यासाठी मागणी केली आहे.
-----