झाडाला राखी बांधून केले वृक्षाबंधन

शिरगाव, ता. ८ : शिरगाव येथील आमदार प्रकाश देवळे विद्यालयातील दहावीच्या विद्यर्थिनीनी पर्यावरणपूरक उपक्रम साजरा करीत झाडाला राखी बांधून आगळे वेगळे वृक्षाबंधन साजरे केले. या विद्यर्थीनीनी पर्यावरणाविषयी असणारे प्रेम आणि झाडांचे संरक्षण करणे ही काळाची असलेली गरज या उपक्रमामधून दाखवून दिली आहे. बहिणीने भावाला राखी बांधल्याने तो तिचे संरक्षण करतो ही परंपरा आहे. परंतु या विद्यर्थीनीनी झाडालाच आपला भाऊ मानला आहे. त्याला राखी बांधून त्याचेच संरक्षण करण्याची जबाबदारी घेऊन एक नवीन परंपरा सुरू केली आहे. त्यामुळे या उपक्रमाचे सर्वत्र कौतुक होत आहे. यावेळी या मुलींनी भविष्यात कोणतेच झाड तोडणार नाही, अशी शपथ देखील घेतली. झाडांच्या संगोपानाबरोबर नवीन झाडे लावण्याचा संकल्पही या मुलींनी केला आहे. या विषयी शाळेचे उपक्रमशील शिक्षक हनुमान सुरणार म्हणाले, ‘‘या मुलींनी हा पर्यावरणपूरक उपक्रम केला आहे. खरे तर मोठ्या माणसांनी हा उपक्रम करण्याची गरज आहे तर आणि तरच झाडे वाचवली जातील आणि दरवर्षी ढळणारा पर्यावरणाचा समतोल राखण्यास काही का होईना हातभार लागणार आहे, ही बाब महत्त्वाची आणि समाधानाची आहे. आजच्या विद्यार्थ्यांमध्ये पर्यावरणाविषयी आत्मीयता निर्माण होणे महत्त्वाचे आहे, त्यामुळे असे उपक्रम सरावच शाळेत राबवले जाणे काळाची गरज आहे. शाळेचे शिक्षक संतोष चव्हाण, राधेश्याम वारे, रामभाऊ घुगे, किरण धादवड, विष्णू सानप, बिरुदेव कोळेकर, साकेत कारंकर, राहुल होवाळ आदी उपस्थित होते.

आम्हाला आमच्या शिक्षकांनी झाडांचे आणि पर्यावरणाचे महत्त्व सांगितले होते. त्यामुळे आम्ही झाडाला राखी बांधून त्यांना आमचा भाऊ मानले आहे. आम्ही झाडे तर तोडणार नाहीच परंतु दरवर्षी आणखी झाडे लावू.
- आसरीता बरला, विद्यार्थिनी

मुलीना इतक्या कमी वयात पर्यावरणाविषयी जागरूकता निर्माण झाली आहे. त्यामुळे त्यांचे कौतुक करावे तेवढे कमी आहे. त्यामुळे भविष्यात बरीच झाडे तोडली जाणार नाहीत आणि बरीच झाडे नव्याने लावली जातील.
- रमेश फरताडे, मुख्याध्यापक