गोडुंब्रे येथे बिबट्याच्या हल्ल्यात एका वासराचा मृत्यू तर दोन वासरे जखमी

शिरगाव, ता. ९ : गोडुंब्रे येथील गोशाळेत बिबट्याच्या हल्ल्यात एका वासराचा मृत्यू तर दोन वासरे जखमी झाल्याची घटना शनिवारी पहाटे घडली.
प्रेमचंद बोरा यांच्या गोशाळेत जनावरांची काळजी घेण्यासाठी असलेले गणेश अडागळे यांना रात्री कुत्र्यांच्या भुंकण्याचा आवाज आला. त्यांनी जनावरांच्या गोठ्यात पत्राच्या फटीतून पाहिल्यावर बिबट्याने वासराला पकडल्याचे दिसले. त्यावेळी त्यांनी लोखंडी रॉडने पत्र्याला वाजवून मोठ्याने आवाज केला असता बिबट्याने तिथून पळ काढला.
वनपरिक्षेत्र अधिकारी प्रकाश शिंदे, वनपाल एम. एस. हिरेमठ यांच्या मार्गदर्शनाखाली वनरक्षक वाय. एस. कोकाटे व वनमजूर अजित ओव्हाळ यांनी घटनास्थळी भेट देऊन पंचनामा केला. बिबट्याला शोधण्यासाठी टॅप कॅमेरे लावण्यात आले. पशुवैद्यकीय विभागाने जखमी वासरांवर उपचार सुरू केले आहेत. या घटनेमुळे गोडुंब्रे परिसरातील नागरिकांमध्ये भीतीचे वातावरण निर्माण झाले आहे.

परिसरात अनेकांनी बिबट्याल्या पाहिले आहे, वन्य प्राण्यांपासून जिवाला धोका असल्याने नागरिक भीतीच्या वातावरणात वावरत आहेत. वनविभागाने बिबट्याला तत्काळ जेरबंद करावे.
- किशोर सावंत, ग्रामस्थ गोडुंब्रे

गोडुंब्रे येथे बिबट सदृश वन्य प्राण्याने हल्ला केल्याची माहिती मिळताच घटनास्थळी पाहणी करून परिसरात टॅप कॅमेरे लावण्यात आले आहे. तसेच शेतकऱ्याला नुकसान भरपाई मिळणेबाबत पंचनामा केला आहे.
- वाय. एस. कोकाटे, वनरक्षक बेबड ओहोळ परिक्षेत्र