अनधिकृत पोटभाडेकरूंमुळे नागरिक त्रस्त

काळेवाडी, ता. २० : काळेवाडी व रहाटणी भाड्याने दिलेल्या गाळ्यांचे मालकांनी नवी शक्कल लढवून दुकानाच्या बाहेरील मोकळ्या जागेत तसेच शटर समोरील जागेत पोटभाडेकरू ठेवले आहेत. अनेक ठिकाणी महापालिकेच्या रस्त्यावर, पदपथावर पोटभाडेकरू ठेवून त्यावर पैसे कमावण्याचा प्रकार सुरु आहे. नियम धाब्यावर बसविणारे, महापालिकेचा कर चुकविणारे आणि सामान्य नागरिकांना त्रस्त करणारे व्यावसायिक आणि त्यांचे पोटभाडेकरू महापालिकेचा अतिक्रमण विभाग आणि पोलिसांना दिसत नाहीत का, त्यांच्याकडे दुर्लक्ष का, असे प्रश्न निर्माण झाले आहेत.
महापालिका आणि पोलिसांना कारवाईसाठी कोणता मुहूर्त हवा आहे असा प्रश्न नागरिकांनी उपस्थित केला आहे. प्रशासनातील काही अधिकारी व कर्मचाऱ्यांच्या भूमिकेबद्दल शंका उपस्थित होत आहे. सगळे संगनमताने सुरू असून यात ‘देवाणघेवाण’ होत असल्याचाही नागरिकांचा आरोप आहे.
या परिसरातील गृहनिर्माण संस्थांतील रहिवासी व पादचाऱ्यांना मात्र त्रास सहन करावा लागत आहे. या परिसरात गृहनिर्माण संस्था आणि एकूणच रहिवासी क्षेत्र वाढल्याने रस्ते, उद्यान व विविध व्यवसाय विकसित झाले. अनेक ठिकाणी सराफांपासून पान दुकानदारांपर्यंत अनेक जण व्यवसाय करीत आहेत. बहुतांश दुकानदार भाडेतत्वावर आहेत.
पोटभाडेकरूंमध्ये ज्यूस पार्लरपासून ते ट्रॅव्हल्स, पान दुकान, भाजी विक्रेते, फळवाले, छोटे व्यावसायिक आहेत. मूळ मालकांनी ज्या दुकान किंवा शोरूमसमोर पोटभाडेकरू ठेवले आहेत तेथे तीन हजार रुपयांपासून सात हजार रुपयांपर्यंत रक्कम घेतली जाते. गर्दीच्या चौकात असे पोटभाडेकरू जागा अडवून त्रास देत असल्याची नागरिकांची तक्रार आहे.
आधीच एखाद्या दुकान, शोरूम समोरील वाहने लावण्याची जागा मूळ व्यावसायिकाकडे असताना व कायद्याने ती देणे बंधनकारक असताना पोटभाडेकरू ठेवले जातात. परिणामी ग्राहक व इतर नागरिकांना वाहने रस्त्यावर लावावी लागतात. त्यांना मात्र वाहतूक पोलिस दंड ठोठावतात. पोटभाडेकरूंमुळे पदपथ अडल्यामुळे कोंडी, गर्दी वाढते. त्यातून अपघाताची शक्यता वाढते.
---
अनधिकृत पोटभाडेकरू असणारा परिसर
- काळेवाडी फाटा ते एम. एम. विद्यालय, दुतर्फा बिआरटीएस रस्ता
- रहाटणी फाटा ते रहाटणीगाव, छत्रपती शिवाजी महाराज चौक
- काळेवाडी पेट्रोल पंप ते पिंपरी नदी पूल, मुख्य रस्ता
- काळेवाडी गाव अंतर्गत परिसरातील भारतमाता चौक परिसर
कारवाई करण्याची कारणे
- काही ठिकाणी मुख्य रस्त्यावर तर काही ठिकाणी पार्किंग असणाऱ्या ठिकाणी कब्जा
- कोणत्याही प्रकारचा कर न भरता अनधिकृत दुकाने थाटणे
- जास्त उत्पन्न मिळवण्यासाठी नियम धाब्यावर
- व्यावसायिकांची कायदेशीर नोंद व माहिती नसणे
- गुन्हेगारी पार्श्वभूमी असलेले काही घटक
- पोटभाडेकरूंकडून निकृष्ट दर्जाचे वस्तू विकून नागरिकांची फसवणूक
-----