काळेवाडी, रहाटणीमध्ये अनधिकृत पोटभाडेकरुंना ऊत

संदीप सोनार ः सकाळ वृत्तसेवा
काळेवाडी, ता. २१ : काळेवाडी, रहाटणी येथील भाडेकरु व्यावसायिकांनी नवी शक्कल लढवून दुकानासमोरील रस्ता, पदपथ, बाहेरील मोकळ्या जागा तसेच शटर समोरील जागेत अनधिकृतरीत्या पोटभाडेकरू ठेवले आहेत. त्यावर पैसे कमावण्याचे प्रकार सुरू आहे. मात्र, त्याने दोषी व्यावसायिकांऐवजी वाहने उभी करणाऱ्या चालकांनाच पोलिसांचा दंड सहन करावा लागत आहे. याशिवाय अपघाताचाही धोका वाढला आहे.
काळेवाडी, रहाटणी परिसरात अनेक गृहनिर्माण संस्थांसह एकूणच रहिवासी क्षेत्र वाढल्याने विविध व्यवसाय विकसित झाले. सराफांपासून पान दुकानदारांपर्यंत अनेक जण व्यवसाय करत आहेत. बहुतांश दुकानदार हे भाडेतत्वावर आहेत. त्यांनी आपल्या ताब्यातील गाळ्यांसमोरील मोकळ्या जागेत आणि काहींनी चक्क पदपथावर पोटभाडेकरुंना जागा दिली आहे. या पोटभाडेकरूंमध्ये ज्यूस पार्लरपासून ते ट्रॅव्हल्स, पान दुकान, भाजी विक्रेते, फळवाले, छोटे व्यावसायिक आहेत. त्यांच्याकडून तीन हजार रुपयांपासून सात हजार रुपयांपर्यंत रक्कम भाडे म्हणून घेतली जाते. शेकडो पोटभाडेकरूंनी वर्दळीच्या चौकातील जागा अडविल्या आहेत. त्याचा त्रास परिसरातील गृहनिर्माण संस्थांतील रहिवासी व पादचाऱ्यांना सहन करावा लागत आहे.

वाहनचालकांनाच दंड
दुकान, शोरूम समोरील वाहने लावण्याची जागा असताना ती वाहनांच्या वापरासाठी कायद्याने देणे बंधनकारक आहे. मात्र, तेथे पोटभाडेकरू ठेवले जात आहेत. परिणामी, ग्राहक व इतर नागरिकांना वाहने रस्त्यांवर लावावी लागतात. मात्र, त्यांना वाहतूक पोलिस दंड ठोठावतात. पदपथांवर अडथळा झाल्याने गर्दी आणि कोंडी वाढत आहे. त्यातून अपघाताची शक्यता देखील वाढत आहे.

बेकायदा पोटभाडेकरुंचा परिसर
- काळेवाडी फाटा ते एम. एम. विद्यालय, दुतर्फा बीआरटीएस रस्ता
- रहाटणी फाटा ते रहाटणीगाव, छत्रपती शिवाजी महाराज चौक
- काळेवाडी पेट्रोल पंप ते पिंपरी नदी पूल, मुख्य रस्ता
- काळेवाडी गाव अंतर्गत परिसरातील भारतमाता चौक परिसर

कारवाई गरजेची का ?
- मुख्य रस्त्यावर तर काही ठिकाणी वाहनतळांवर कब्जा
- कोणत्याही प्रकारचा कर न भरता अनधिकृत दुकाने थाटणे
- जास्त उत्पन्न मिळवण्यासाठी नियम धाब्यावर
- व्यावसायिकांची कायदेशीर नोंद व माहिती नसणे
- गुन्हेगारी पार्श्वभूमी असलेले काही घटक
- निकृष्ट दर्जाचे वस्तू विकून नागरिकांची फसवणूक

पोटभाडेकरू ही नव्याने निर्माण झालेली समस्या असून महापालिकेच्या क्षेत्रामध्ये विविध ठिकाणी नियमांना झुगारून केलेले हे अतिक्रमण दिसून येते. एखादा मूळ व्यावसायिक आपल्या जागेत दुसऱ्या व्यावसायिकाला थोडी जागा भाड्याने देऊन अवाच्यासव्वा पैसे कमवताना दिसून येत आहे. महापालिकेने त्यावर कडक कारवाई करावी
- बच्चन जाधव, रहिवासी

वाहनतळाच्या ठिकाणी खाद्यपदार्थांसह इतर व्यवसाय मोठ्या संख्येने दिसत आहे. दुकानदार गाळे भाड्याने घेऊन पोटभाडेकरू ठेवतो. वाहनतळाच्या जागेत असे स्टॉल देऊन ते नागरिकांची गैरसोय करत आहेत. वाहने नागरिकांना नाइलाजास्तव रस्त्यावर लावावे लागतात. त्यामुळे, पोलिसांच्या दंडात्मक कारवाईला सामोरे जावे लागते.
- लोकेश पवार, नागरिक

कोणत्याही प्रकारची परवानगी न घेता दुकानदार अनधिकृतपणे पोटभाडेकरू ठेवत असतील; तर वरिष्ठांशी चर्चा करुन त्यांच्या आदेशानुसार कारवाई केली जाईल. एखादे दुकान देखील अनधिकृत असेल; तर त्यांच्यावरही कारवाई करण्यात येईल.
- किशोर ननवरे, ‘ग’ क्षेत्रीय अधिकारी