नोंदणीकृत ३७८ दिव्यांगांना तळेगाव नगरपरिषदेकडून अनुदानाचे वाटप

तळेगाव दाभाडे, ता. २७ ः तळेगाव दाभाडे नगरपरिषदेच्या दिव्यांग कल्याण विभागाच्यावतीने शहरातील नोंदणीकृत ३७८ दिव्यांग लाभार्थींना अनुदानाचे वाटप करण्यात आले. प्रत्येक लाभार्थ्याला चालू वर्षातील अनुदानाचा दुसरा हप्ता मिळाला असून प्रत्येक लाभार्थ्याच्या खात्यावर ७ हजार १२२ रूपये वर्ग करण्यात आले आहे. 
तळेगाव दाभाडे नगरपरिषदेचे मुख्याधिकारी डॉ. प्रवीण निकम, उपमुख्याधिकारी ममता राठोड यांच्या मार्गदर्शनाखाली दिव्यांग कल्याण विभागाचे प्रमुख जयंत मदगे यांनी वाटपाचे नियोजन केले. 
नगरपरिषदेच्यावतीने हद्दीतील दिव्यांगांना दरवर्षी अनुदानाचे वाटप केले जाते. यावर्षी एप्रिल २०२४ पहिला हप्ता तर ऑगस्टमध्ये दुसऱ्या हप्त्याचे वाटप करण्यात आले. यावर्षीच्या अर्थसंकल्पात दिव्यांगांकरिता ८० लाख ९८ हजार रूपयांची तरतूद करण्यात आली आहे. 
मदने म्हणाले,‘‘प्रत्येक दिव्यांगाला २०२४, २५ या आर्थिक वर्षात २१ हजार ३६६ रूपये मिळणार असून एप्रिल व ऑगस्ट अशा दोन हफ्त्यांची रक्कम प्रत्येकाच्या खात्यावर जमा झाली असून तिसरा व शेवटचा ७ हजार १२२ रूपयांचा हप्ता मार्चपूर्वी बॅंक खात्यावर जमा होईल.’’