मावळातील इंग्रजी शाळांची मनमानी

तळेगाव दाभाडे, ता. १९ : मावळ तालुक्यातील काही नामांकित खासगी इंग्रजी शाळांनी जादा शुल्क आकारणी सुरू केल्याचा आरोप काही सामाजिक कार्यकर्ते आणि पालकांनी केला आहे. शिवाय, शालेय साहित्य खरेदीची सक्ती या संस्था करत आहेत, अशी तक्रार समोर आली आहे.
तालुक्यात जिल्हा परिषदेच्या २८७ शाळा असून, तेथे सातवीपर्यंतचे शिक्षण मोफत दिले जाते. तसेच वह्या, पुस्तके, गणवेशही मोफत दिले जाते. तरीही, इंग्रजीच्या मोहात पडून काही पालकांचा ओढा खासगी इंग्रजी शाळांकडे दिसत आहे. त्याचा फायदा घेत अनेक व्यक्तींनी इंग्रजी शाळा सुरू केल्या. काही शाळांमध्ये दरवर्षी एका विद्यार्थ्यांकडून २५ हजारांपासून ते एक लाखापर्यंत शुल्क आकारले जाते. याशिवाय डोनेशन, गणवेश, शालेय साहित्य, बूट, मोजे यांची सक्ती केली जाते आणि ती वस्तू ठराविक दुकानातूनच विकत घेण्यास भाग पाडले जाते. बाजारभाव आणि शाळांनी सुचवलेल्या दरांमध्ये मोठा फरक आहे.
एखाद्या कुटुंबात दोन किंवा अधिक मुले असल्यास हा खर्च सहन करणे सामान्यांच्या आवाक्याबाहेरचे ठरते. तरीही “मुलाने इंग्रजी शिकले पाहिजे” या मानसिकतेतून अनेक पालक कर्ज काढून फी भरत आहेत.

काही शाळांकडून गणवेशासह शैक्षणिक साहित्य त्यांनी सांगितलेल्या ठिकाणाहूनच घेण्याची सक्ती केली जाते. शुल्कातही दरवर्षी वाढ केली जाते. या वाढीबाबत शासनाने लक्ष घालून संबंधित शाळांवर कारवाई करावी.
- अरुण माने, सामाजिक कार्यकर्ते

कोणत्याही शाळाने स्टेशनरी, शूज, व इतर शालेय साहित्य ठराविक ठिकाणी खरेदी करण्याची सक्ती करू नये. शाळा व्यवस्थापन समितीला विश्वासात घेऊन शालेय शुल्क वाढीबाबत धोरण ठरवावे. कोणतीही इंग्रजी शाळा नियमबाह्य पद्धतीने सक्ती करत असेल, तर पालकांनी तक्रार करावी. तालुक्यातील अनेक शाळांबाबत तक्रारी आल्या असून चौकशी करून कारवाई करण्यात येईल.
- सुदाम वाळुंज, गटशिक्षणाधिकारी, मावळ