मुंबई-पुणे द्रुतगती मार्गावर युवकाचा मृतदेह

तळेगाव दाभाडे, ता. १९ : मुंबई-पुणे द्रुतगती महामार्गालगत बेडसे गावाजवळ नाल्यामध्ये युवकाचा मृतदेह आढळला. ही घटना १८ जूनच्या सायंकाळी उघडकीस आली. या व्यक्तीचा धारधार शस्राने खून करण्यात आल्याचे समोर आले आहे. या प्रकरणी कामशेत पोलिस ठाण्यात गुन्हा दाखल करण्यात आला आहे.
याबाबत पोलिस सूत्रांकडून मिळालेल्या माहितीनुसार, मृत व्यक्तीचे वय अंदाजे ३० ते ३५ वर्षांदरम्यान होते. तो अंगाने सडपातळ असून, उंची सुमारे ५.५ फूट, रंग सावळा आहे. त्याच्या उजव्या हातावर लाल धागा बांधलेला आहे. अंगावर फुलप्रिंटचा पांढरा शर्ट, पिवळी कॉलर आणि काळी जीन्स पॅंट आहे.
आरोपीने शस्त्राने गळा चिरून आणि पोटावर वार करत खून केला असावा आणि मृतदेह महामार्गालगत टाकल्याचा संशय पोलिसांनी व्यक्त केला आहे. पोलिस निरीक्षक रवींद्र पाटील यांच्या मार्गदर्शनाखाली अधिक तपास सुरू आहे.